საქართველოს სოფლის მეურნეობის მეცნიერებათა აკადემიის

წევრ-კორესპონდენტი ლევან ლაზიშვილი -100

  საქართველოს სოფლის მეურნეობის მეცნიერებათა აკადემიის სურსათის უვნებლობის და სასურსათო ტექნოლოგიის მეცნიერებათა განყოფილებაში მიმდინარე წლის 27 თებერვალს მოეწყო მრგვალი მაგიდა, რომელიც მიეძღვნა ტექნიკის მეცნიერებათა დოქტორის, პროფესორის, დამსახურებული ინჟინრისა და გამომგონებლის, საქართველოს სოფლის მეურნეობის მეცნიერებათა აკადემიის წევრ-კორესპონდენტის ლევან ლაზიშვილის დაბადებიდან 100 წლისთავს.

     მრგვალ მაგიდას ესწრებოდნენ: აკადემიის სურსათის უვნებლობის და სასურსათო ტექნოლოგიის მეცნიერებათა განყოფილების აკადემიკოს-მდივანი, აკადემიკოსი ზურაბ ცქიტიშვილი, განყოფილების წევრები, აკადემიკოსები: თემურ რევიშვილი, გურამ პაპუნიძე, ედიშერ კვესიტაძე, წევრ-კორესპონდენტი მალხაზ დოლიძე, აკადემიური დეპარტამენტის უფროსი, აკადემიკოსი მარინე ბარვენაშვილი, ასევე აკადემიის წამყვანი სპეციალისტი ლარისა ჩაიკა და საინფორმაციო ცენტრის ხელმძღვანელი ქეთევან ჭიპაშვილი. აღსანიშნავია რომ მრგვალ მაგიდას სტუმრის სტატუსით ესწრებოდა საქართველოს ჩაის მწარმოებელთა ასოციაციის პრეზიდენტი, ბატონი თენგიზ სვანიძე.

            მრგვალი მაგიდა გახსნა და დამსწრე საზოგადოებას მისასალმებელი სიტყვით მიმართა სურსათის უვნებლობის და სასურსათო ტექნოლოგიის მეცნიერებათა განყოფილების აკადემიკოს-მდივანმა, აკადემიკოსმა ზურაბ ცქიტიშვილმა. ბატონმა ზურაბმა ხაზი გაუსვა ლევან ლაზიშვილის დამსახურებას ქართული ჩაის პოპულარიზაციის მიმართულებით, მის ღვაწლს დარგის განვითარების საქმეში. შემდეგ სიტყვა გადასცა აკადემიკოს გურამ პაპუნიძეს, რომელიც ფართო მოხსენებით წარსდგა აუდიტორიის წინაშე.

აკადემიკოსმა გურამ პაპუნიძემ მსმენელებს გააცნო ლევან ლაზიშვილის ბიოგრაფიული მონაცემები. აღინიშნა, რომ ლევან ლაზიშვილი სპეციალობით გახლდათ ჩაისა და სუბტროპიკული კულტურების გადამუშავების ინჟინერ-ტექნოლოგი, რომელმაც ცხოვრების უდიდესი ნაწილი ჩაის მცენარის კულტურის შესწავლას დაუთმო. ამაზე ნათლად მეტყველებს მისი საკანდიდატო და სადოქტორო ნაშრომები, რომლებიც შესაბამისად დაიცვა თემებზე: ,,ლაოჩას ტექნოლოგია“ და „ჩაის მცენარის უხეში ყლორტების გამოკვლევა და მათი რაციონალური გამოყენებისა და ტექნოლოგიური პროცესების ინტენსიფიკაციის გზები“. მომხსენებელმა ასევე ყურადღება გაამახვილა ლ. ლაზიშვილის საქმიანობაზე, როგორც ხელმძღვანელ თანამდებობებზე ყოფნისას, ასევე სამეცნიერო-კვლევით დაწესებულებებში მუშაობისას. კერძოდ, იმაზე რომ ბატონი ლევანი წლების განმავლობაში გენერალური დირექტორის რანგში წარმატებით ხელმძღვანელობდა ბათუმის ჩაის ფაბრიკების სარაიონოთშორისო საწარმოო და ქობულეთის სარაიონო საწარმოო გაერთიანებებს. იყო ბათუმის აგრარული ბიოტექნლოგიებისა და ბიზნესის ინსტიტუტის დირექტორის მოადგილე სამეცნიერო დარგში, ამავდროულად ეწეოდა პედაგოგიურ მოღვაწეობასაც.

მომხსენებელმა ხაზგასმით აღნიშნა ლ. ლაზიშვილის მიერ წარმოებული მნიშვნელოვანი კვლევები, რომლებიც ეხებოდა ჩაის უხეში ფოთლის ქიმიური თვისებების შესწავლასა და მისგან ლაო-ჩაის დამზადების ტექნოლოგიას; მწვანე და შავი ჩაისათვის ახალი კომპლექსური ტექნოლოგიისა და დაბრიკეტების ახალი ხერხის შემუშავებას; მწვანე ჩაის წარმოებაში ენერგო დამზოგი მეთოდის შესამუშავებლად ჩაის ფოთლის თერმული დამუშავების მანქანათა სისტემის შექმნას და სხვ.

            მრგვალ მაგიდაზე ლ. ლაზიშვილის საქმიანობის შესახებ და მის დამსახურებაზე დარგის განვითარების მიმართულებით ასევე ისაუბრეს აკადემიკოსმა თემურ რევიშვილმა და წევრ-კორესპონდენტმა მალხაზ დოლიძემ. ლ. ლაზიშვილი განსაკუთრებული სითბოთი და სიყვარულით გაიხსენა ბატონმა თენგიზ სვანიძემ, რომელმაც ბატონ ლევანზე ისაუბრა არა მარტო როგორც ნიჭიერ და წარმატებულ მეცნიერზე, არამედ როგორც გულისხმიერ და კეთილმოსურნე ადამიანზე, რომელიც დაჯილდოებული იყო არაერთი დადებითი პიროვნული თვისებით.

            მრგვალი მაგიდის მუშაობა შეაჯამა აკადემიის სურსათის უვნებლობის და სასურსათო ტექნოლოგიის მეცნიერებათა განყოფილების აკადემიკოს-მდივანმა, აკადემიკოსმა ზ. ცქიტიშვილმა, რომელმაც მადლობა გადაუხადა განყოფილების წევრებსა და მოწვეულ სტუმრებს მრგვალი მაგიდის მუშაობაში აქტიური მონაწილეობის მიღებისათვის.