5 ივნისი გარემოს დაცვის მსოფლიო დღე
საქართველოს სოფლის მეურნეობის მეცნიერებათა აკადემიაში ტრადიციულად აღინიშნება გარემოს დაცვის მსოფლიო დღე. არც მიმდინარე წელი იყო გამონაკლისი — 5 ივნისს აკადემიის გარემოს დაცვისა და სატყეო საქმის მეცნიერებათა განყოფილების ორგანიზებით გაიმართა თემატური სხდომა, რომელიც აღნიშნულ თარიღს მიეძღვნა.
სხდომა გახსნა აკადემიის გარემოს დაცვისა და სატყეო საქმის მეცნიერებათა განყოფილების აკადემიკოს-მდივანმა, აკადემიკოსმა ლაშა დოლიძემ. მისასალმებელ სიტყვაში მან მიმოიხილა დღის დაარსების ისტორია და მისი მნიშვნელობა, აღნიშნა, რომ ადამიანი წარმოადგენს როგორც ბუნების ნაწილს, ისე მისი გარდაქმნის უნარის მქონე სუბიექტს, რაც განსაზღვრავს მის ფიზიკურ არსებობასა და ინტელექტუალურ, მორალურ, სოციალურ და სულიერ განვითარებას.
მომხსენებელმა ყურადღება გაამახვილა იმაზე, რომ მეცნიერებისა და ტექნოლოგიების განვითარების შედეგად ადამიანმა მნიშვნელოვნად გაზარდა გარემოს გარდაქმნის შესაძლებლობები, რაც განსაკუთრებულ პასუხისმგებლობას აკისრებს საზოგადოებას ბუნებრივი და ანთროპოგენური გარემოს მიმართ. შესაბამისად, გარემოს დაცვა და მისი მდგრადი მართვა წარმოადგენს თითოეული ადამიანის ვალდებულებას.
შემდგომ სიტყვა გადაეცა საქართველოს ტექნიკური უნივერსიტეტის ცოტნე მირცხულავას სახელობის წყალთა მეურნეობის ინსტიტუტის ირიგაციისა და დრენაჟის განყოფილების ხელმძღვანელს, ასოცირებულ პროფესორ, ტექნიკის დოქტორ შორენა კუპრეიშვილს, რომელმაც წარმოადგინა მოხსენება თემაზე: „მთის ეკოსისტემები“.
მომხსენებელმა აღნიშნა, რომ მთის ეკოსისტემები წარმოადგენს განსაკუთრებით მგრძნობიარე და რთულ ბუნებრივ სისტემებს, სადაც მკვეთრად არის გამოხატული რელიეფის, კლიმატის, ნიადაგისა და წყლის რესურსების ურთიერთქმედება. მან ხაზი გაუსვა წყლის რესურსების მართვის განსაკუთრებულ მნიშვნელობას, როგორც ეკოლოგიური სტაბილურობის, ისე ბუნებრივი საფრთხეების — ღვარცოფების, მეწყერებისა და წყალდიდობების — შემცირების თვალსაზრისით.
აღინიშნა, რომ ამ მიმართულებით მნიშვნელოვანი სამეცნიერო და პრაქტიკული საქმიანობა ხორციელდება საქართველოს ტექნიკური უნივერსიტეტის ცოტნე მირცხულავას სახელობის წყალთა მეურნეობის ინსტიტუტში, სადაც მიმდინარეობს კვლევები წყლის რესურსების მართვის, ჰიდროლოგიური პროცესების, ნაპირსამაგრი ღონისძიებებისა და კლიმატის ცვლილების გავლენის შეფასების მიმართულებით. 
განსაკუთრებული ყურადღება დაეთმო საქართველოს ტექნიკურ უნივერსიტეტში მოქმედ საბაკალავრო პროგრამას — „ბუნებრივი საფრთხეები, მდგრადი გარემო და დაცვა“, სადაც სტუდენტები ეუფლებიან ბუნებრივი კატასტროფების შეფასების, რისკების მართვისა და გარემოს დაცვის თანამედროვე მიდგომებს. პროგრამა აერთიანებს თეორიულ და პრაქტიკულ კომპონენტებს, მათ შორის საველე კვლევებს.
ასევე აღინიშნა სამშენებლო ფაკულტეტზე არსებული პროგრამა „წყლის რესურსების ინჟინერია“, რომელიც ორიენტირებულია ჰიდროტექნიკური ნაგებობების დაგეგმვაზე, წყლის სისტემების მოდელირებასა და ინფრასტრუქტურული გადაწყვეტილებების შემუშავებაზე. წარმოდგენილი მიმართულებები მჭიდროდ უკავშირდება მთის ეკოსისტემების დაცვასა და წყლის რესურსების მდგრად მართვას.
მოხსენების ბოლოს გაიმართა დისკუსია, სადაც დამსწრე საზოგადოებამ არაერთი კითხვა დასვა, რომლებზეც მომხსენებელმა ამომწურავი პასუხები გასცა.
თემატური სხდომის მუშაობაში ასევე მონაწილეობდნენ: აკადემიის აკადემიური დეპარტამენტის უფროსი, აკადემიკოსი მარინე ბარვენაშვილი, აკადემიის წევრ-კორესპონდენტი გიორგი ქავთარაძე, სოფლის მეურნეობის დოქტორი ზვიად ტიგინაშვილი და აკადემიის აპარატის თანამშრომლები — ლარისა ჩაიკა, ქეთევან ჭიპაშვილი და ირინე ბახტაძე.
სხდომა შეაჯამა აკადემიკოსმა ლაშა დოლიძემ, რომელმაც მადლობა გადაუხადა მომხსენებელსა და დამსწრე საზოგადოებას აქტიური მონაწილეობისთვის და აღნიშნა, რომ მსგავსი შეხვედრები ხელს უწყობს გარემოსდაცვითი აქტუალური საკითხების განხილვასა და სამეცნიერო დიალოგის გაღრმავებას.