2022 წლის 21 სექტემბერს ჩატარდა აკადემიის აგროინოვაციების კომისიის სხდომა # 29, რომელზეც მოხსენებით: „თანამედროვე მიდგომები კვების ფიზიოლოგიაში, პრობლემები და გამოწვევები“ წარსდგა ტექნიკის დოქტორი, აკადემიის სტიპენდიატი, სოფლის მეურნეობის სამეცნიერო-კვლევითი ცენტრის მთავარი სპეციალისტი, აგრარული უნივერსიტეტის ასოცირებული პროფესორი ეკატერინა კაციტაძე.

მომხსენებელმა აღნიშნა, რომ უკანასკნელ პერიოდში შეიცვალა ცნობიერება კვების ფიზიოლოგიის საკითხებთან მიმართებაში, რაც განაპირობა არაგადამდები დაავადებებით (აგდ) გამოწვეული სიკვდილიანობის მაღალმა მაჩვენებელმა. კვებასთან ასოცირებული დაავადებები შრომისუუნარობის, ავადობისა და სიკვდილიანობის მთავარი მიზეზია.

შესაბამისად,   საერთაშორისო ორგანიზაციების მიერ (WHO, FAO) გაცემულია რეკომენდაციები, მითითებები: მნიშვნელოვანია კვების რაციონში ხილის და ბოსტნეულის წილის გაზრდა, თავისუფალი შაქრების მოხმარების შეზღუდვა და სხვ.

საქართველოში შემუშავებულია აგდ პრევენციისა და კონტროლის ეროვნული სტრატეგია 2022-2026 წლებისთვის, რომელიც, ერთის მხრივ, ევროასოცირების ვალდებულებების გამოძახილია, მოიცავს აგდ პრევენციისა და კონტროლის გაუმჯობესებას, მეორეს მხრივ, ეფუძნება აგდ პრევენციისა და კონტროლის შესახებ გაეროს გენერალური ასამბლეის მესამე უმაღლესი დონის შეხვედრის დეკლარაციას (2018) - „მოქმედების დროა: დავაჩქაროთ ჩვენი რეაგირება აგდ-ის მიმართ, თანამედროვე და მომავალი თაობების ჯანმრთელობისა და კეთილდღეობისთვის”. ამ პრობლემების გადაწყვეტა პირდაპირ კავშირშია სოფლის მეურნეობის განვითარებასა და მისი ეფექტიანობის ამაღლებსთან, კონკურენტუნარიანი და უვნებელი ადგილობრივი აგროსასურსათო პროდუქციის წარმოებასთან, რასაც სოფლის მეურნეობისა და სოფლის განვითარების 2021-2027 წლების სტრატეგია ითვალისწინებს.

დოქტ. ე. კაციტაძემ წარმოადგინა მის მიერ განხორციელებული სამეცნიერო კვლევები, რომლებიც შემხებლობაშია ზემოთ აღნიშნულ პრობლემებთან - თანამედროვე მოთხოვნების, ბუნებრივად ჯანსაღი, ფუნქციური და პროფილაქტიკური დანიშნულების გადამუშავებული პროდუქტების, მათ შორის სასმელების მიღების ინოვაციური ტექნოლოგიების შემუშავება.

   უნდა აღინიშნოს, რომ კვების ინდუსტრიაში ჩართული მსხვილი და საშუალო მეწარმეების უმრავლესობა არ ფლობს საკმარის ინფორმაციას თანამედროვე მიმართულების სასურსათო პროდუქტებზე, ზემოთ აღნიშნულ გლობალურ გამოწვევებთან მიმართებაში არ აქვთ მომავლის ხედვა და შემოიფარგლებიან მოკლევადიანი ეფექტით. საჭიროა მათი ცოდნის/ინფორმირებულობის ამაღლება; სასოფლო-სამეურნეო ღირებულებათა ჯაჭვის განვითარების უზრუნველყოფა ინოვაციურ ტექნოლოგიებზე, კოოპერაციაზე, მწარმოებელთა ხელშეწყობაზე ფოკუსირების გზით; მოსახლეობის ცნობიერების დონის ამაღლება დაუბალანსებელი, არაჯანსაღი კვების და აგდ-ს გავრცელების მიზეზ-შედეგობრივ კავშირებზე; საკანონმდებლო კუთხით გარკვეული რეგულაციების შემოღება.

მოხსენების შემდეგ გამართულ დისკუსიაში მონაწილეობნენ აკადემიკოსები ნუგზარ ბაღათურია, ელგუჯა შაფაქიძე და ალექსანდრე დიდებულიძე, გარემოს დაცვისა და სოფლის მეურნეობის სამინისტროს წარმომადგენლები - მინისტრის მრჩეველი, დოქტორი ომარ კაჭარავა, პროფესორები ომარ თედორაძე, სამეცნიერო ცენტრის მთავარი სპეციალისტი დოქტორი ერნა კალანდია, აგრარული უნივერსიტეტის პროფესორი მედეა ბურჯანაძე,   დოქტორი ზურაბ ლოლაძე („აგროქართლი“), ინჟინერ-ტექნოლოგი ცინული ნაცვლიშვილი („აგროჰაბი“), რომლებმაც დადებითად შეაფასეს ჩატარებული კვლევა და ხაზი გაუსვეს წარმოდგენილი მასალის აქტუალურობას.