ღვაწლმოსილი მეცნიერის  -    აკადემიკოს ელგუჯა შაფაქიძის ხსოვნა

       საქართველოს სოფლის მეურნეობის მეცნიერებათა აკადემია ღრმა მწუხარებით იუწყება, რომ გარდაიცვალა ღვაწლმოსილი მეცნიერი, პედაგოგი, საქართველოს სოფლის მეურნეობის მეცნიერებათა აკადემიის ნამდვილი წევრი, აკადემიკოსი, ტექნიკის მეცნიერებათა დოქტორი, საქართველოს სოფლის მეურნეობის მეცნიერებათა აკადემიის აკადემიკოს-მდივანი, აკადემიის აკადემიური დეპარტამენტის უფროსი, პროფესორი ელგუჯა შაფაქიძე.

     ბატონი ელგუჯა შაფაქიძე დაიბადა ქალაქ თბილისში, 1942 წლის 20 აგვისტოს მოსამსახურის ოჯახში. 1958 წელს წარჩინებით დაამთავრა ქალაქ თბილისის ივანე ჯავახიშვილის სახელობის 53-ე საშუალო სკოლა (ყოფილი მე-7 ვაჟთა საშუალო სკოლა) და მუშაობა დაიწყო ქალაქ თბილისის ელმავალმშენებელ ქარხანაში ხარატად, სადაც იმუშავა 1962 წლამდე. პარალელურად 1959 წელს ჩაირიცხა საქართველოს სასოფლო-სამეურნეო ინსტიტუტის სოფლის მეურნეობის მექანიზაციის ფაკულტეტზე, რომელიც წარჩინებით დაამთავრა 1965 წელს და მიენიჭა ინჟინერ- მექანიკოსის კვალიფიკაცია.

     ინსტიტუტის დამთავრების შემდეგ იგი დატოვეს სამუშაოდ საქართველოს სასოფლო-სამეურნეო ინსტიტუტის „ვენახის შრომატევადი სამუშაოების“ პრობლემურ ლაბორატორიაში უფროს კონსტრუქტორად. 1968 წელს ბატონი ელგუჯა ჩაირიცხა საქართველოს სასოფლო-სამეურნეო ინსტიტუტის ნიადაგდამამუშავებელი მანქანა-იარაღების კათედრის ასპირანტად. 1972 წელს დაიცვა საკანდიდატო დისერტაცია თემაზე: „ვენახის საცავ ზოლში ნიადაგის დამუშავების მექანიზაცია“ და მიენიჭა ტექნიკის მეცნიერებათა კანდიდატის სამეცნიერო ხარისხი.

 1966-1967 წლებში გაიარა სამხედრო სავალდებულო სამსახურს და იყო თადარიგის კაპიტანი.

     1974 წელს იგი კონკურსით არჩეული იქნა საქართველოს სასოფლო-სამეურნეო ინსტიტუტის მეაბრეშუმეობის სასწავლო-კვლევით ფაკულტეტზე მექანიზაციის განყოფილების გამგედ.

   1978 წელს მას მიენიჭა უფროსი მეცნიერ მუშაკის სამეცნიერო წოდება.

   1981 წელს ბატონი ელგუჯა დაინიშნა სოფლის მეურნეობის მექანიზაციის ფაკულტეტის დეკანის მოადგილედ, ხოლო 1987 წელს ინსტიტუტის სამეცნიერო საბჭოს გადაწყვეტილებით არჩეულ იქნა ამავე ფაკულტეტის დეკანად, სადაც იმუშავა 2005 წლამდე.

     1985 წელს მას მიენიჭა დოცენტის, ხოლო 1993 წელს-პროფესორის სამეცნიერო წოდება.

   1994 წელს ბატონმა ელგუჯამ დაიცვა სადოქტორო დისერტაცია თემაზე: „მეაბრეშუმეობის შრომატევადი ტექნოლოგიური პროცესების მექანიზაცია“ და მიენიჭა ტექნიკის მეცნიერებათა დოქტორის სამეცნიერო ხარისხი.

   1995 წელს იგი არჩეულ იქნა საქართველოს სოფლის მეურნეობის მეცნიერებათა აკადემიის წევრ-კორესპონდენტად, ხოლო 2015 წელს აკადემიის ნამდვილ წევრად (აკადემიკოსად).

   1997 წელს ბატონი ელგუჯა აირჩიეს უმაღლესი სკოლის მეცნიერების საერთაშორისო აკადემიის აკადემიკოსად;

2004 – 2009 წლებში არჩეული იქნა საქართველოს სოფლის მეურნეობის მეცნიერებათა აკადემიის საინჟინრო განყოფილების აკადემიკოს-მდივნად.

     2005-2007 წლების პერიოდში ბატონი ელგუჯა მუშაობდა საქართველოს სახელმწიფო სასოფლო-სამეურნეო უნივერსიტეტის ნიადაგდამამუშავებელი და სამშენებლო მანქანების კათედრის პროფესორად და უნივერსიტეტის ხარისხის უზრუნველყოფის სამსახურის უფროსად.

   2006 წლიდან 2013 წლამდე არჩეული იქნა სრული პროფესორის აკადემიურ თანამდებობაზე საქართველოს სახელმწიფო აგრარული უნივერსიტეტის (ამჟამად საქართველოს აგრარული უნივერსიტეტი) სოფლის მეურნეობის მექანიზაციის მიმართულებით.

   2011 წელს იგი აირჩიეს საქართველოს საინჟინრო აკადემიის ნამდვილ წევრად - აკადემიკოსად.

     უნივერსიტეტში მუშაობის პერიოდში აქტიურად ეწეოდა სასწავლო-პედაგოგიურ და სამეცნიერო-კვლევით საქმიანობას. 1998 – 2005 წლებში იგი იყო საქართველოს სახელმწიფო აგრარული უნივერსიტეტის საინჟინრო სადისერტაციო საბჭოს თავმჯდომარე.

     2012 წლიდან იგი არის გაერთიანებული ერების ორგანიზაციის მეაბრეშუმეობის ასოციაცია BACSA-ს კოორდინატორი საქართველოში.

   2013 წლის 4 იანვრიდან უკანასკნელ დღემდე ბატონი ელგუჯა შაფაქიძე მუშაობდა საქართველოს სოფლის მეურნეობის მეცნიერებათა აკადემიაში აკადემიური დეპარტამენტის უფროსად, აკადემიის აკადემიკოს - მდივნად.

   იგი აქტიურად იყო ჩართული სამეცნიერო-კვლევით საქმიანობაში. გამოქვეყნებული აქვს 283 სამეცნიერო ნაშრომი, მათ შორის 8 მონოგრაფია, 8 სახელმძღვანელო, 13 რეკომენდაცია, მიღებული აქვს 10 საავტორო მოწმობა, 8 პატენტი გამოგონებაზე, 6 რაციონალიზატორული წინადადება.

     მისი ხელმძღვანელობით დაცულია 4 დისერტაცია ტექნიკის მეცნიერებათა ხარისხის მოსაპოვებლად და ორი დისერტაცია დოქტორის აკადემიური ხარისხის მოსაპოვებლად. მონაწილეობა აქვს მიღებული მრავალ ადგილობრივ და საერთაშორისო სამეცნიერო კონფერენციებში, სიმპოზიუმებსა და კონგრესებში.

                       ბატონი ელგუჯა 1988 წელს დაჯილდოვდა მედლით „შრომის ვეტერანი“. 1999 წელს საქართველოს პრეზიდენტის ბრძანებით დაჯილდოვდა „ღირსების ორდენით“, 2006 წელს მიენიჭა „წლის ინჟინრის“ საპატიო წოდება. 2016 წელს მის ნაშრომს „საქართველოს მეაბრეშუმეობა-პრობლემები, რეაბილიტაცია, აღორძინება” მიენიჭა საქართველოს სოფლის მეურნეობის მეცნიერებათა აკადემიის პრემია აგრარულ დარგში საუკეთესო ნაშრომისათვის. 2017 წელს დაჯილდოვდა საქართველოს სოფლის მეურნეობის მეცნიერებათა აკადემიის საპატიო სიგელით აგროსაინჟინრო დარგში მიღწეული წარმატებებისათვის.

         აკადემიკოს ელგუჯა შაფაქიძის სახით ქართულმა აგრარულმა მეცნიერებამ დაკარგა ღვაწლმოსილი მამულიშვილი, მეცნიერი და პედაგოგი, რომლის სახელი სამუდამოდ დარჩება მისი მეგობრების, კოლეგებისა და მოწაფეების ხსოვნაში.

საქართველოს სოფლის მეურნეობის მეცნიერებათა აკადემია

  15 თებერვალს შედგა კომისიის სხდომა, რომელზეც განხილული იქნა სსიპ ღვინის ეროვნული სააგენტოს მევენახეობის კადასტრის სამმართველოში მომზადებული მოხსენება: „საქართველოს ვენახების კადასტრის აგების გზები და შედეგები“ (ავტორები: სოფლის მეურნეობის დოქტორი, მთავარი სპეციალისტი ირმა მდინარაძე და სამმართველოს უფროსი, სოფლის მეურნეობის დოქტორი დავით მაღრაძე).

სხდომა შესავალი სიტყვით გახსნა კომისიის თავმჯდომარემ აკადემიკოსმა ალექსანდრე დიდებულიძემ, რომელმაც მოკლედ დაახასიათა საქართველოს მეღვინეობის სექტორში არსებული მდგომარეობა და გადასაწყვეტი პრობლემები, ხაზი გაუსვა ვენახების კადასტრის შექმნის უდიდეს როლს ამ პრობლემების გადაჭრაში.

მომხსენებელმა დავით მაღრაძემ აღნიშნა, რომ ვენახების კადასტრი გააჩნია ევროკავშირის წევრ ყველა იმ ქვეყანას, სადაც განვითა­რებუ­ლია მევენახეობა-მეღვინეობა. არსებული   რეალობიდან გამომდინარე, საქართველოს ვენახე­ბის კადასტრის დაგეგმვა და განხორციელება შეიძლება დახასიათდეს, როგორც ევროპული გამოცდი­ლე­ბისკენ წინ გადადგმული ნაბიჯი. ზემოთ მოყვანილის გათვალისწინებით, სსიპ ღვინის ეროვნული სააგენტო 2014 წლიდან ახორციელებს საქართველოს ვენახების კადასტრის პროექტს, რომელიც წარმოადგენს ვენახების ფართობებისა და ყურძნის წარმოების მონიტორინგის საშუალებას; იგი იქმნება ვენახის ნაკვეთების შესახებ დეტალური აგრონომიული ინფორმაციის შეკრებით, მევენახეებისა და მეღვინეების რეესტრის შექმნითა და მისი მუდმივი განახლებით აერო ფოტო სურათებზე დაფუძნებული საანკეტო ინფორმაციის შეკრებით.

ვენახების კადასტრის მიზანს წარმოადგენს:

ვაზისა და ღვინის სექტორში არსებული ყველა ერთეულის (საწარმოს) შესახებ ინფორმაციის რეგისტრაცია და შენახვა;

ინფორმაციის შეგროვება, რეგისტრაცია და შენახვა საქართველოს ვენახების ადგილმდებარეობის, მათი ფართობის, ჯიშური შემადგენლობის, დარგვის წლისა და მევენახეობის პრაქტიკასთან დაკავშირებული სხვა მაჩვენებლების ჩათვლით GIS ტექნოლოგიებზე დაყრდნობით;

ვენახების საანკეტო (ე.წ. “ალფანუმერული”) და გრაფიკული ისტორიული მონაცემების წარმოება-შენახვა;  

მევენახეობის ზონების გათვალისწინება ვენახების საწარმოო პოტენიცალის ანალიზისათვის, ახალი ზონების შექმნის ხელშეწყობა და არსებული ზონების საზღვრების დაზუსტება;

ყურძნის მოსავლისა და ღვინის პროდუქციის პროგნოზირება, სტატისტიკური ანგარიშების შემუშავება მევენახეობის რეესტრში შეკრებილი ინფორმაციის საფუძველზე და სხვა.

2014-2021 წლებში ვენახების კადასტრის პროექტის ფარგლებში სრულად აღიწერა კახეთის, რაჭისა და ლეჩხუმის მევენახეობის ზონების ვენახები, ჯამში 42089 ჰა ფართობზე. რთველი აღნიშნულ ზონებში ჩატარდა ვენახების კადასტრის ამონაწერების საფუძველზე, ხოლო 2022 წელს კადასტრის აგების სამუშაოები გაგრძელდა ქართლის (შიდა ქართლი, ქვემო ქართლი) მევენახეობის ზონაში - რეგიონის რუკები ატვირთული იქნა ვენახების კადასტრის ერთიან მონაცემთა ბაზაში, რომლებზედაც განხორციელდა ვენახების პოლიგონების მოხაზვა და ამჟამად მიმდინარეობს საკადასტრო ინფორმაციის შეკრება. 2023 წელს დაგეგმილია კადასტრის აგების სამუშაოების გაგრძელება მესხეთის, იმერეთის, გურიის, სამეგრელოს და აჭარის მევენახეობის ზონებში.

მოხსენების შემდეგ გამართულ დისკუსიაში მონაწილეობდნენ აკადემიის ვიცე-პრეზიდენტი, აკადემიკოსი გივი ჯაფარიძე, აკადემიკოსები ნოდარ ჭითანავა და ალექსანდრე დიდებულიძე, პროფესორები ცოტნე სამადაშვილი, გელა ჯავახიშვილი, ნოდარ ხატიაშვილი, ოთარ ქარჩავა, ანზორ მესხიშვილი, აკადემიის სტიპენდიატი დოქტორი ეკატერინა კაციტაძე, დოქტორი ზურაბ ლოლაძე, რომლებმაც ხაზი გაუსვეს საქართველოს ვენახის კადასტრის შექმნის მიმართულებით მნიშვნელოვან მიღწევებს და ახალი წარმატებები უსურვეს კადასტრის სამმართველოს წევრებს მათ შემდგომ მუშაობაში.

     მიმდინარე წლის 13 თებერვალს საქართველოს სოფლის მეურნეობის მეცნიერებათა აკადემიის საკონფერენციო დარბაზში გაიმართა საზეიმო სხდომა, რომელიც მიეძღვნა მეცნიერ ქალთა და გოგონათა საერთაშორისო დღეს. სხდომას ესწრებოდნენ: აკადემიის პრეზიდენტი, აკადემიკოს გურამ ალექსიძე, აკადემიის პრეზიდენტის მოადგილე, სამეცნიერო განყოფილებების კოორდინატორი, აკადემიკოსი ანატოლი გიორგაძე, მეცხოველეობის და ვეტერინარიის მეცნიერებათა განყოფილების აკადემიკოს-მდივანი, აკადემიკოსი ჯემალ გუგუშვილი, აკადემიის სამეცნიერო განყოფილებების სწავლული მდივნები: დოქტორი მარინე ბარვენაშვილი და აკადემიკოსი ლაშა დოლიძე, აკადემიის აკადემიური და ადმინისტრაციული დეპარტამენტების თანამშრომლები და მოწვეული სტუმრები, რომელთა შორის ბრძანდებოდნენ საქართველოს განათლებისა და მეცნიერების სამინისტროს უმაღლესი განათლების დეპარტამენტის უფროსი ზაზა მარუაშვილი, მეცნიერების დეპარტამენტის თანამშრომელი ზურაბ ხუციშვილი და აგრარულ დარგში მოღვაწე მეცნიერ-აგრარიკოსი ქალბატონები.

სხდომა გახსნა და აუდიტორიას მისასალმებელი სიტყვით მიმართა აკადემიის პრეზიდენტმა, აკადემიკოსმა გურამ ალექსიძემ.   მან მოკლედ მიმოიხილა მეცნიერ ქალთა და გოგონათა საერთაშორისო დღის დაარსების მიზანი. აღნიშნა, რომ დღეს საქართველოში მეცნიერების სხვადასხვა დარგში არაერთი მეცნიერი ქალბატონი მოღვაწეობს, რომელთა შორის მრავლად არიან წარმატებული მეცნიერი აგრარიკოსი-ქალბატონები. მათ მნიშვნელოვანი წვლილი შეაქვთ ქვეყნის აგრარული მეცნიერების და შესაბამისად დარგის განვითარებაში, რის გამოც აღნიშნული ქალბატონების შრომა და ღვაწლი მეტად საგულისხმო და დასაფასებელია. შემდეგ ბატონმა გურამმა სიტყვა გადასცა აკადემიის სამეცნიერო განყოფილებების სწავლულ მდივანს, დოქტორ მარინე ბარვენაშვილს, რომელიც დამსწრე საზოგადოების წინაშე წარსდგა მოხსენებით: „საქართველოს აგრარული დარგის გამოჩენილი მეცნიერო ქალები“. 

დოქტორმა მ. ბარვენაშვილმა მიმოიხილა აგრარულ დარგში მოღვაწე წარსულის და თანამედროვეობის გამოჩენილი მეცნიერი ქალბატონების სამეცნიერო-კვლევითი საქმიანობის ამსახველი მნიშვნელოვანი ეპიზოდები, მ. შ. ქსენია ბახტაძის, რომელიც გახლდათ პირველი ქართველი აკადემიკოსი ქალბატონი. მის მიერ გამოყვანილი ჩაის 19 ჯიშიდან, "ქართული სელექციური ჩაი №1"-ს, და "ქართული სელექციური ჩაი №2"-ს, შექმნისათვის 1948 წელს ქალბატონ ქსენია ბახტაძეს მიენიჭა საბჭოთა კავშირის სახელმწიფო პრემია. ქვეყნის წინაშე არანაკლები დამსახურება მიუძღოდა ქალბატონ რუსუდან ხუბუტიასაც, რომლის სამეცნიერო მოღვაწეობა ეხებოდა საქართველოში სასოფლო-სამეურნეო კულტურების დასარეველიანობის პრობლემას, აგროცენოზის ფორმირების კანონზომიერებებს, სარეველების მავნეობის, ბიოეკოლოგიის ასპექტებს. ქალბატონი რუსუდანი გახლდათ საქართველოს სოფლის მეურნეობის მეცნიერებათა აკადემიის წევრ/კორესპონდენტი.

რაც შეეხება დღევანდელობას, მომხსენებელმა ყურადღება გაამახვილა საქართველოს სოფლის მეურნეობის მეცნიერებათა აკადემიის აკადემიკოსზე, ქალბატონ გოგოლა მარგველაშვილზე, რომელიც ამავდროულად გახლავთ აკადემიის აგრონომიულ მეცნიერებათა განყოფილების აკადემიკოს-მდივანი. სპეციალობით აგროქიმიკოსი, იგი საქართველოს ისტორიაში ამ დარგში ერთადერთი ქართველი აკადემიკოსი ქალია. საყურადღებოა ისიც, რომ აკადემიკოსი გოგოლა მარგველაშვილი ითვლება აღმოსავლეთ საქართველოს ძირითადი ტიპის ნიადაგებში ფოსფორიანი სასუქების ეფექტური გამოყენების თეორიული და პრაქტიკული საფუძვლების დამუშავების ქართული სამეცნიერო სკოლის ხელმძღვანელად. შემდეგ დოქტორმა მ. ბარვენაშვილმა ისაუბრა სოფლის მეურნეობის მეცნიერებათა დოქტორის ლამარა ჯიქიას, ვეტერინარიის მეცნიერებათა დოქტორი ზაირა ქაფიაშვილის, ბიოლოგიის მეცნირებათა დოქტორის მზაღო ლობჟანიძისა და სოფლის მეურნეობის დოქტორის ნატალია დიაკოვას სამეცნიერო და პედაგოგიური საქმიანობის შესახებ, მათ ღვაწლზე აგრარული მეცნიერების განვითარების საქმეში.

მოხსენების დასასრულს დოქტორმა მ. ბარვენაშვილმა დარბაზში მყოფ მეცნიერ-ქალბატონებს კიდევ ერთხელ მიულოცა მეცნიერ ქალთა და გოგონათა საერთაშორისო დღე, უსურვა დიდხანს სიცოცხლე, ჯანმრთელობა და წარმატება სამეცნიერო საქმიანობაში.

დოქტორ მ. ბარვენაშვილის მოხსენების შემდეგ, აკადემიის პრეზიდენტმა, აკადემიკოსმა გ. ალექსიძემ სიტყვა გადასცა საქართველოს განათლებისა და მეცნიერების სამინისტროს უმაღლესი განათლების დეპარტამენტის უფროსს, ბატონ ზაზა მარუაშვილს. ბატონმა ზაზამ დარბაზში მყოფ ქალბატონებს მიულოცა ღირსშესანიშნავი თარიღი და წინსვლა უსურვა თავიანთ დარგებში. შემდეგ ისაუბრა ქართველ მეცნიერ ქალბატონებზე,   მათ როლზე ქვეყანაში მეცნიერების განვითარების მიმართულებით, ასევე ქვეყნის მასშტაბით ზემოაღნიშნულ თარიღთან ჩატარებულ ღონისძიებებზე და აქტივობებზე. ბატონმა ზაზამ იმედი გამოთქვა, რომ მეცნიერი ქალი-აგრარიკოსები კვლევაც ჩვეული შემართებითა და ენთუზიაზმით გააგრძელებენ თავიან საქმიანობას და საკუთარ სიტყვას იტყვიან როგორც სამეცნიერო-კვლევით საქმიანობაში, ასევე მომავალი თაობის განათლების კუთხით.

მეცნიერ ქალთა და გოგონათა საერთაშორისო დღისადმი მიძღვნილი საზეიმო სხდომის ბოლოს, სოფლის მეურნეობის მეცნიერებათა აკადემიის პრეზიდენტმა, აკადემიკოსმა გურამ ალექსიძემ აგრარულ დარგში სამეცნიერო მიღწევებისათვის აკადემიის საპატიო სიგელებით დააჯილდოვა 19 წარმატებული ქალბატონი, რომელთა შორის იყვნენ საქართველოს სოფლის მეურნეობის მეცნიერებათა აკადემიის, სსიპ სამეცნიერო-კვლევითი ცენტრის, საქართველოს ტექნიკური უნივერსიტეტის, საქართველოს აგრარული უნივერსიტეტის ჩაის და სუბტროპიკული კულტურების ინსტიტუტის, ბათუმის შოთა რუსთაველის სახელობის სახელმწიფო უნივერსიტეტის, სსიპ ღვინის ეროვნული სააგენტოს წარმომადგენლები.  

საქართველოს სოფლის მეურნეობის მეცნიერებათა აკადემიის საპატიო სიგელებით დაჯილდოებულმა ქალბატონებმა მადლობა გადაუხადეს აკადემიის პრეზიდენტს ესოდენ დიდი დაფასებისათვის და აღუთქვეს, რომ კვლავაც დიდ შემართებით გააგრძელებენ შემოქმედებით და სამეცნიერო საქმიანობას ჩვენი ქვეყნის საკეთილდღეოდ.            

სწავლულ ექსპერტთა რეესტრის პორტალის პროექტის განხილვა საქართველოს სოფლის მეურნეობის მეცნიერებათა აკადემიაში

  მიმდინარე წლის 2 თებერვალს საქართველოს სოფლის მეურნეობის მეცნიერებათა აკადემიის საკონფერენციო დარბაზში გაიმართა მრგვალი მაგიდა, რომელზეც დამსწრე საზოგადოებას მიეწოდა ინფორმაცია „სწავლულ ექსპერტთა რეესტრის“ პორტალის შექმნის საკითხებთან დაკავშირებით. მრგვალი მაგიდის მუშაობაში მონაწილეობას ღებულობდნენ საქართველოს სოფლის მეურნეობის მეცნიერებათა აკადემიის პრეზიდენტი, აკადემიკოსი გურამ ალექსიძე, აკადემიის პრეზიდენტის მოადგილე, სამეცნიერო განყოფილებების კოორდინატორი, აკადემიკოსი ანატოლი გიორგაძე, აკადემიის მეცხოველეობის და ვეტერინარიის მეცნიერებათა განყოფილების აკადემიკოს-მდივანი, აკადემიკოსი ჯემალ გუგუშვილი, აკადემიის აგროინჟინერიის მეცნიერებათა განყოფილების აკადემიკოს-მდივანი, აკადემიკოსი რევაზ მახარობლიძე, აკადემიის სამეცნიერო განყოფილებების სწავლული მდივნები: დოქტორი მარინე ბარვენაშვილი და აკადემიკოსი ლაშა დოლიძე, აკადემიის წამყვანი სპეციალისტები: ლარისა ჩაიკა, დალი თარხნიშვილი, ქეთევან ჭიპაშვილი და მარიკა მოსაშვილი.

ინფორმაცია „სწავლულ ექსპერტთა რეესტრის“ პორტალის შექმნასთან დაკავშირებით აუდიტორიას მიაწოდა საქართველოს მეცნიერებათა ეროვნული აკადემიის საინფორმაციო ცენტრის ხელმძღვანელმა, ფილოსოფიის დოქტორმა ზურაბ ჯიბლაძემ, რომელმაც აღნიშნა, რომ საქართველოს მეცნიერებათა ეროვნული აკადემია დაინტერესებულ ორგანიზაციებთან თანამშრომლობით, თითქმის ორი წელია მუშაობს წარმოდგენილი პორტალის შექმნაზე. უკვე მომზადებულია პირველი სამუშაო ვერსია, განისაზღვრა ძირითადი პარამეტრები, რომელი კრიტერიუმებითაც შეირჩევიან სწავლული ექსპერტები.

ბატონმა ზურაბმა ყურადღება გაამახვილა იმ ფაქტზე, რომ უკანასკნელ პერიოდში ქვეყანაში მომრავლდა ე. წ. „ექსპერტად“ წოდებული პირები, რომელთა პროფესიონალიზმი და კვალიფიკაცია ხშირ შემთხვევაში გარკვეულ კითხვებს ბადებს. ამიტომ საჭირო გახდა ქვეყანაში შექმნილიყო ერთიანი ბაზა, სადაც თავს მოიყრიდნენ სხვადასხვა დარგის ქმედუნარიანი მეცნიერ-სპეციალისტები,   რომელთა კომპეტენციაც ეჭვს არ გამოიწვევდა. შესაბამისად, სწავლული ექსპერტად უნდა იწოდებოდეს სამეცნიერო ხარიხის და/ან სხვა სამეცნიერო წოდებების მქონე პირი, რომლის კომპეტენციაც დადასტურებული იქნება მისი სამეცნიერო-პრაქტიკული მოღვაწეობის აღიარებული შედეგებით. რაც შეეხება სწავლულ ექსპერტთა რეესტრის მიზანს, ესაა სახელისუფლო ორგანოებისთვის, ადგილობრივი თვითმმართველობებისთვის, ბიზნეს სექტორისთვის, კვლევითი დაწესებულებებისთვის და გადაწყვეტილების მიმღები სხვა პირებისთვის, გამართული მექანიზმის უზრუნველყოფა, რათა მსურველებმა ადვილად მიიღონ ინფორმაცია, კონსულტაციები და შესაბამისი ექსპერტული მომსახურება, სწორი და ოპტიმალური გადაწყვეტილების მისაღებად. შემდეგ ბატონმა ზ. ჯიბლაძემ აუდიტორიას წარუდგინა „სწავლულ ექსპერტთა რეესტრის“ პორტალის სამუშაო ვერსია, ფილტრები (მიმართულება, დარგი, ქვედარგი, რეგიონი, უცხოეთი), რომელთა საშუალებითაც შესაძლებელი გახდება ექსპერტის მოძიება სასურველი სფეროსა და ადგილმდებარეობის მიხედვით.

პრეზენტაციის ბოლოს, მომხსენებელმა აღნიშნა, რომ წარმოდგენილი „სწავლულ ექსპერტთა რეესტრის“ პორტალი ჯერ-ჯერობით მხოლოდ სამუშაო ვერსიაა და მასზე მომუშავე ჯგუფი სიამოვნებით გაითვალისწინებს შენიშვნებსა და სურვილებს.

„სწავლულ ექსპერტთა რეესტრის“ პორტალთან დაკავშირებით აზრი გამოთქვეს აკადემიის პრეზიდენტმა, აკადემიკოსმა გ. ალექსიძემ, აკადემიის პრეზიდენტის მოადგილემ, სამეცნიერო განყოფილებების კოორდინატორმა, აკადემიკოსმა ანატოლი გიორგაძემ, აკადემიის აგროინჟინერიის მეცნიერებათა განყოფილების აკადემიკოს-მდივანმა, აკადემიკოსმა რევაზ მახარობლიძემ, რომლებმაც აღნიშნეს, რომ შესრულებულია მეტად მნიშვნელოვანი, რთული და დიდი მოცულობის სამუშაოები, და რომ ის პარამეტრები, რომელი კრიტერიუმებითაც შეირჩევიან სწავლული ექსპერტები, საუკეთესოდ გამოავლენს დარგის ჭეშმარიტ პროფესიონალებს.

მრგვალი მაგიდის მუშაობა შეაჯამა აკადემიის პრეზიდენტმა, აკადემიკოსმა გ. ალექსიძემ. მან თავისი და დამსწრე საზოგადოების სახელით მადლობა გადაუხადა ბატონ ზურაბ ჯიბლაძეს მობრძანებისა და საინტერესო პრეზენტაციისათვის.  

„სწავლულ ექსპერტთა რეესტრის“ პორტალი შეგიძლიათ იხილოთ  

             ვებ.გვერდზე: rle.gtu.ge

ურთიერთთანამშრომლობის მემორანდუმი

საქართველოს სოფლის მეურნეობის მეცნიერებათა აკადემიასა და გარემოს დაცვისა და სოფლის მეურნეობის სამინისტროს შორის

მიმდინარე წლის 3 თებერვალს საქართველოს გარემოს დაცვისა და სოფლის მეურნეობის სამინისტროში გაიმართა შეხვედრა საქართველოს სოფლის მეურნეობის მეცნიერებათა აკადემიისა და სამინისტროს ხელმძღვანელობას შორის.

     საქართველოს სოფლის მეურნეობის მეცნიერებათა აკადემიიდან შეხვედრაში მონაწილეობდნენ: აკადემიის პრეზიდენტი, აკადემიკოსი გურამ ალექსიძე, აკადემიის ვიცე-პრეზიდენტი, აკადემიკოსი გივი ჯაფარიძე, პრეზიდიუმის მრჩეველი და სამეცნიერო მიმართულებების კონსულტანტი აკადემიკოსი ნოდარ ჭითანავა, აკადემიის პრეზიდენტის მოადგილე, აკადემიკოსი ანატოლი გიორგაძე. 

   საქართველოს გარემოს დაცვისა და სოფლის მეურნეობის სამინისტროდან - ხელმძღვანელები და დეპარტამენტის უფროსები: მინისტრი ბატონი ოთარ შამუგია, მინისტრის პირველი მოადგილე ბ-ნი გიორგი ხანიშვილი, მინისტრის მოადგილე ბ-ნი სოლომონ პავლიაშვილი, მინისტრის მოადგილე ბ-ნი აპოლონ კაკაბაძე, სოფლის მეურნეობის, სურსათისა და სოფლის განვითარების დეპარტამენტის უფროსი ბ-ნი თენგიზ კალანდაძე, პოლიტიკის კოორდინაციისა და ანალიტიკის ხელმძღვანელი ქ-ნი ეკატერინე ზვიადაძე, მინისტრის მრჩეველი ბ-ნი ომარ კაჭარავა.   

                     შეხვედრა წარიმართა შემდეგი დღის წესრიგით:

1.მისალმება.

 მინისტრის ოთარ შამუგია;

 აკადემიის პრეზიდენტი აკადემიკოსი გურამ ალექსიძე.

2.საქართველოს გარემოს დაცვისა და სოფლის მეურნეობის სამინისტროს სოფლის მეურნეობის და მეცნიერებათა აკადემიას შორის ურთიერთთანამშრომლობის მემორანდუმის განხილვა და გაფორმება. მომხსენებელი: აკადემიის პრეზიდიუმის მრჩეველი აკადემიკოსი ნოდარ ჭითანავა.  

3. ურთიერთანამშრომლობის მემორანდუმის ძირითადი მიზნები და ამოცანები.  

მომხსენებელი: აკადემიის ვიცე-პრეზიდენტი, აკადემიკოსი გივი ჯაფარიძე.

4. საქართველოს დასავლეთ რეგიონებში მცენარეთა მავნებლის ,,ფაროსანას“ წინააღმდეგ ბრძოლის ახალი მეთოდების დანერგვის შესაძლებლობის შესახებ აკადემიის ინფორმაცია.

მომხსენებელი: აკადემიის პრეზიდენტი, აკადემიკოსი გურამ ალექსიძე. 

5. საქართველოს სოფლის მეურნეობის მეცნიერებათა-აკადემიისა და საქართველოს გარემოს დაცვისა და სოფლის მეურნეობის სამინისტროს შორის ურთიერთთანამშრომლობის გაფართოება და გააქტიურება, სოფლის მეურნეობის პროდუქტებისა და სურსათის წარმოების დღევანდელი პრობლემებიდან გამომდინარე.

მომხსენებელი: მინისტრის მოადგილე გიორგი ხანიშვილი. 

   შეხვედრის დასასრულს გაიმართა მემორანდუმზე ხელმოწერის ცერემონია.

ურთიერთთანამშრომლობის მემორანდუმი საქართველოს სოფლის მეურნეობის მეცნიერებათა აკადემიასა და

გარემოს დაცვისა და სოფლის მეურნეობის სამინისტროს შორის შეგიძლიათ იხილოთ ბმულზე .

 მიმდინარე წლის 31 იანვარს საქართველოს მეცნიერებათა აკადემიის საკონფერენციო დარბაზში

ჩატარდა პრეზიდიუმის სხდომა, სადაც განხილული იქნა შემდეგი საკითხები:

 1. ინფორმაცია აკადემიის აგრონომიულ მეცნიერებათა განყოფილების მიერ 2022 წელს გაწეული სამეცნიერო საქმიანობის შესახებ (იხილე ბმულზე).

მომხსენებელი: აკადემიის აგრონომიულ მეცნიერებათა განყოფილების აკადემიკოს-მდივანი, აკადემიკოსი გოგოლა მარგველაშვილი

2. ინფორმაცია აკადემიის მეცხოველეობის და ვეტერინარიის მეცნიერებათა განყოფილების მიერ 2022 წელს გაწეული სამეცნიერო საქმიანობის შესახებ (იხილე ბმულზე).

მომხსენებელი: აკადემიის მეცხოველეობის და ვეტერინარიის მეცნიერებათა განყოფილების აკადემიკოს-მდივანი, აკადემიკოსი ჯემალ გუგუშვილი

3.   ინფორმაცია აკადემიის აგროინჟინერიის მეცნიერებათა განყოფილების მიერ 2022 წელს გაწეული სამეცნიერო საქმიანობის შესახებ (იხილე ბმულზე).

მომხსენებელი: აკადემიის აგროინჟინერიის მეცნიერებათა განყოფილების აკადემიკოს-მდივანი, აკადემიკოსი რევაზ მახარობლიძე

4. ინფორმაცია აკადემიის სურსათის უვნებლობის და სასურსათო ტექნოლოგიის მეცნიერებათა განყოფილების მიერ 2022 წელს გაწეული სამეცნიერო საქმიანობის შესახებ (იხილე ბმულზე).

მომხსენებელი: აკადემიის სურსათის უვნებლობისა და სასურსათო ტექნოლოგიის მეცნიერებათა განყოფილების აკადემიკოს-მდივანი, აკადემიკოსი ზურაბ ცქიტიშვილი

5. ინფორმაცია აკადემიის გარემოს დაცვისა და სატყეო საქმის მეცნიერებათა განყოფილების  მიერ 2022 წელს გაწეული სამეცნიერო საქმიანობის შესახე (იხილე ბმულზე).

მომხსენებელი: აკადემიის გარემოს დაცვისა და სატყეო საქმის მეცნიერებათა განყოფილების აკადემიკოს-მდივანი, აკადემიკოსი რევაზ ჩაგელიშვილი

6. ინფორმაცია აკადემიის ეკონომიკურ მეცნიერებათა განყოფილების  მიერ 2022 წელს გაწეული სამეცნიერო საქმიანობის შესახებ (იხილე ბმულზე).

მომხსენებელი: აკადემიის ეკონომიკურ მეცნიერებათა განყოფილების  აკადემიკოს-მდივანი, აკადემიკოსი ომარ ქეშელაშვილი

  25 იანვარს შედგა კომისიის სხდომა, რომელზეც მოხსენებით: „სუპერმარკეტ „აგროჰაბ“-ის გადამამუშავებელი საწარმოს როლი ინოვაციური პროდუქტების შექმნაში“ გამოვიდა „აგროჰაბ“-ის ხილ-ბოსტნეულის გადამუშავების ინჟინერ-ტექნოლოგი, ექსპერტი ცინული ნაცვლიშვილი.

მომხსენებელმა აღნიშნა, რომ კომპანია „აგროჰაბი“-ს 2016 წლის დეკემბერში დაარსების მიზანი იყო მოსახლეობისთვის მაღალხარისხიანი, ნატურალური სურსათის, მ.შ. ადგილობრივი ფერმერებისგან შეძენილი ნედლეულის გადამუშავების შედეგად მიღებული კონსერვებისა და ნახევარფაბრიკატების მიწოდება. „აგროჰაბ“-ში“ მიმზიდველი გარემოა ინოვაციური ფორმულების შესამუშავებლად და ახალი პროდუქტების შესაქმნელად. ამჟამად სხვადასხვა დასახელების საწებლები, მურაბები, ჯემები, კომპოტები და სხვ.   წარმოებისას გამოიყენება როგორც კლასიკური, ასევე უახლესი ტექნოლოგიები, რაც უზრუნველყოფს მზა პროდუქტის კვებითი და ბიოლოგიური ღირებულებების შენარჩუნებას.

„აგროჰაბი“-ს გადამამუშავებელ საწარმოში მზადდება ხელოვნური დანამატებისგან თავისუფალი პროდუქცია, ნედლეულის შერჩევა ხდება კეთილსინდისიერი ფერმერებისგან, რომლებიც იცავენ ძირითად აგროწესებს და ნორმებს,   დაწყებული ნიადაგიდან დამთავრებული მოსავლის მიღებამდე. ნედლეულის მაღალი ხარისხი სტიმულს გვაძლევს ვაწარმოოთ მისგან ჯანსაღი და სასარგებლო პროდუქცია. ტექნოლოგიაში არ გამოიყენება   კონსერვანტები და საღებავები.

განვითარებულ ქვეყნებში კარგად იციან ჯანმრთელობის ფასი და ბიოპროდუქტების მნიშვნელობაც; მიმდინარეობს კვების პროდუქტების ეკოლოგიზაციის პროცესი. საქართველოს ბევრ რეგიონში განსაკუთრებული ყურადღება ექცევა ბუნებრივი პირობების შენარჩუნებას - ტრადიციულად იწარმოება ნატურალური პროდუქტები. ჩვენც ამ გზას ვირჩევთ; უარს ვაცხადებთ გენომოდიფიცირებული ნედლეულის გამოყენებაზე. „აგროჰაბ“-ში შეიქმნა რამდენიმე ინოვაციური პროდუქტი იმ პირობის გათვალისწინებით, რომ მომხმარებელს მიეწოდოს ჯანმრთელობისთვის სასარგებლო, ამასთან, მიმზიდველი ორგანოლეპტიკური თვისებების სასურსათო პროდუქტი.

   უნდა აღინიშნოს, რომ საწარმოს სიმძლავრე თანდათან იზრდება. უახლოეს მომავალში ექსპლუატაციაში შევა თანამედროვე დანადგარებით აღჭურვილი გადამამუშავებელი საწარმო, რაც საშუალებას მოგვცემს კიდევ უფრო გავაფართოვოთ მზა პროდუქციის ასორტიმენტი. ვგეგმავთ გამოვუშვათ დიაბეტური, საბავშვო, სასაუზმე კონსერვების სხვადასხვა სახეობა - დაკვეთა თვით მომხმარებლიდან მოდის, ამიტომ ყველა მოწოდებული ვართ ამ მიზნის მისაღწევად!

მოხსენების შემდეგ გამართულ დისკუსიაში მონაწილეობდნენ: აკადემიკოსი გივი ჯაფარიძე, დოქტორი გოჩა ცოფურაშვილი, სოფლის მეურნეობის სამინისტროს დეპარტამენტის უფროსი თენგიზ კალანდაძე, დოქტორი ეკატერინა კაციტაძე, დოქტორი ერნა კალანდია, დოქტორი მერაბ ჟღენტი, პროფესორი ანზორ მესხიშვილი, „აგროჰაბ“-ის საოპერაციო დირექტორი ნინი ნანაძე, დოქტორანტი ბიძინა იმნაძე, აკადემიის სტიპენდიატი გიორგი ქუთელია, აკადემიკოსები: ნოდარ ჭითანავა, ალექსანდრე დიდებულიძე, რომლებმაც აღნიშნეს სუპერმარკეტის ბაზარზე ინოვაციური პროდუქციის გავრცელების მიმართულებით მნიშვნელოვანი წარმატებები.

სხდომის შემდეგ ჩატარდა „აგროჰაბი“-ს ინოვაციური საკონსერვო პროდუქციის გამოფენის დათვალიერება და დეგუსტაცია; დიდი მოწონება მოიპოვეს კაკლის მურაბამ, კივის საწებელმა და სხვა პროდუქტებმა.

საქართველოს სოფლის მეურნეობის მეცნიერებათა აკადემიის

პრეზიდიუმის სხდომა

2022 წლის 27 დეკემბერს ჩატარდა საქართველოს სოფლის მეურნეობის მეცნიერებათა აკადემიის პრეზიდიუმის სხდომა შემდეგი დღის წესრიგით:

1. საქართველოს სოფლის მეურნეობის მეცნიერებათა აკადემიის  2023 წლის პერსპექტიული სამუშაო გეგმის შესახებ.

მომხსენებლები: აკადემიის  პრეზიდენტი, აკადემიკოსი გურამ ალექსიძე; აკადემიის ვიცე-პრეზიდენტი, აკადემიკოსი გივი ჯაფარიძე.

3. საქართველოს სოფლის მეურნეობის მეცნიერებათა აკადემიის 2022 წლის ბიუჯეტის ხარჯვისა და 2023 წლის ბიუჯეტის პარამეტრების შესახებ;

მომხსენებლები: აკადემიის  პრეზიდენტი, აკადემიკოსი გურამ ალექსიძე;  აკადემიის მთავარი ბუღალტერი ნინო სოზიაშვილი.

4. ინფორმაცია საქართველოს სოფლის მეურნეობის მეცნიერებათა აკადემიაში 2022 წელს ჩატარებული ინვენტარიზაციის შედეგების შესახებ;

მომხსენებელი: აკადემიის პრეზიდენტის მოადგილე, ინვენტარიზაციის კომისიის თავმჯდომარე, აკადემიკოსი ანატოლი გიორგაძე

5. ინფორმაცია საქართველოს სოფლის მეურნეობის მეცნიერებათა აკადემიის წევრების სამეცნიერო-კვლევითი საქმიანობის 2023 წლის თემატიკის შესახებ (იხილეთ ბმულზე).

მომხსენებელი: აკადემიის აკადემიური დეპარტამენტის უფროსი, აკადემიის აკადემიკოს-მდივანი, აკადემიკოსი ელგუჯა შაფაქიძე;

6. მიმდინარე საკითხები

      2022 წლის 23 დეკემბერს საქართველოს სოფლის მეურნეობის მეცნიერებათა აკადემიაში ჩატარდა აკადემიის საერთო კრება. კრებას ესწრებოდნენ აკადემიის პრეზიდენტი, აკადემიკოსი გურამ ალექსიძე, აკადემიის ვიცე-პრეზიდენტი, აკადემიკოსი გივი ჯაფარიძე, აკადემიის პრეზიდენტის მოადგილე, სამეცნიერო განყოფილებების კოორდინატორი, აკადემიკოსი ანატოლი გიორგაძე, აკადემიის აკადემიური დეპარტამენტის უფროსი, აკადემიის აკადემიკოს-მდივანი, აკადემიკოსი ელგუჯა შაფაქიძე, აკადემიკოსები: რევაზ ასათიანი, ჯემალ გუგუშვილი, ალექსანდრე დიდებულიძე, ვაჟა კვალიაშვილი, ედიშერ კვესიტაძე, როლანდ კოპალიანი, პაატა კოღუაშვილი, გოგოლა მარგველაშვილი, რევაზ მახარობლიძე, თემურ რევიშვილი, გურამ ტყემალაძე, ზაურ ფუტკარაძე, თენგიზ ყურაშვილი, ზაურ ჩანქსელიანი, ნოდარ ჩხარტიშვილი, ზურაბ ცქიტიშვილი, ნოდარ ჭითანავა, რეზო ჯაბნიძე; აკადემიის სტიპენდიატები: ეკატერინა კაციტაძე, გიორგი ქავთარაძე, გიგა ქვარცხავა, გიორგი ქუთელია; აკადემიის სამეცნიერო განყოფილებების სწავლული მდივნები: აკადემიკოსი ლაშა დოლიძე და დოქტორი მარინე ბარვენაშილი, აკადემიის ნამდვილი წევრობის (აკადემიკოსობის) კანდიდატი, სოფლის მეურნეობის დოქტორი ლევან უჯმაჯურიძე, აკადემიის აკადემიური და ადმინისტრაციული დეპარტამენტის თანამშრომლები; ასევე მოწვეული სტუმრები: პარლამენტის აგრარული კომიტეტის აპარატის უფროსი, დოქტორი ივერი ახალბედაშვილი და ჟურნალ „აგრარული საქართველოს“ მთავარი რედაქტორი შოთა მაჭარაშვილი.

აკადემიის საერთო კრებას თავმჯდომარეობდა  აკადემიის პრეზიდენტი, აკადემიკოსი გურამ ალექსიძე, კრების მდივანი იყო პრეზიდენტი მოადგილე, აკადემიკოსი ანატოლი გიორგაძე. კრების თავმჯდომარემ დამსწრე საზოგადოებას მისალმების შემდეგ გააცნო დღის წესრიგი, რომელიც მოიცავდა შემდეგ საკითხებს: 1.   საქართველოს სოფლის მეურნეობის მეცნიერებათა აკადემიის მიერ 2022 წელს ჩატარებული სამეცნიერო საქმიანობის შესახებ. მომხსენებლები: საქართველოს სოფლის მეურნეობის მეცნიერებათა აკადემიის პრეზიდენტი, აკადემიკოსი გურამ ალექსიძე; აკადემიის ვიცე-პრეზიდენტი, აკადემიკოსი გივი ჯაფარიძე;  2. ინფორმაცია საქართველოს სოფლის მეურნეობის მეცნიერებათა   აკადემიის მიერ აკადემიის ნამდვილი წევრის (აკადემიკოსის) ვაკანტური ადგილის დასაკავებლად გამოცხადებული კონკურსის შესახებ. მომხსენებელი: საქართველოს სოფლის მეურნეობის მეცნიერებათა აკადემიის პრეზიდენტი, აკადემიკოსი გურამ ალექსიძე; (იხ.ბმული) 3. საქართველოს სოფლის მეურნეობის მეცნიერებათა აკადემიის ნამდვილი წევრის (აკადემიკოსის) ასარჩევად გამოცხადებული კონკურსის მაღალორგანიზებულად მომზადებისა და ჩატარების მიზნით აკადემიის პრეზიდენტის ბრძანებით შექმნილი საექსპერტო-საკონკურსო კომისიის დასკვნის შესახებ. (ოქმი იხ. ბმულზე) მომხსენებელი: საექსპერტო-საკონკურსო კომისიის თავმჯდომარე, აკადემიკოსი ნოდარ ჭითანავა; 4. საქართველოს სოფლის მეურნეობის მეცნიერებათა აკადემიის მიერ გამოცხადებულ კონკურსში აკადემიის ნამდვილი წევრის (აკადემიკოსის) ვაკანტური ადგილების დასაკავებლად არჩევნების ჩატარება. (ფარული კენჭისყრა). 5. მიმდინარე საკითხები.

დღის წესრიგით გათვალისწინებული პირველი საკითხის ირგვლივ მოხსენება გააკეთა აკადემიის პრეზიდენტმა, რომელმაც მსმენელებს გააცნო 2022 წლის განმავლობაში აკადემიაში ჩატარებული აქტივობების შესახებ.  აღინიშნა, რომ როგორც ყოველთვის, მიმდინარე წელიც საკმაოდ დატვირთული იყო  სხდომებით, სემინარებითა და მრგვალი მაგიდებით,  გაიმართა 2 ადგილობრივი და ერთი საერთაშორისო  სამეცნიერო კონფერენცია. აკადემიამ უმასპინძლა  არაერთ სტუმარს, რომელთა შორის აღსანიშნავია საქართველოს გარემოს დაცვისა და სოფლის მეურნეობის მინისტრის, ბატონ ოთარ შამუგიას და აჭარის ავტონომიური რესპუბლიკის სოფლის მეურნეობის მინისტრის, ბატონ ზაზა შავაძის ვიზიტები და სხვ. კრებამ მოიწონა და დადებითად შეაფასა საქართველოს სოფლის მეურნეობის მეცნიერებათა აკადემიის მიერ 2022 წელს ჩატარებული სამეცნიერო საქმიანობა. შემდეგ აკადემიის პრეზიდენტმა დამსწრე საზოგადოებას სრული ინფორმაცია მიაწოდა საქართველოს სოფლის მეურნეობის მეცნიერებათა  აკადემიის მიერ აკადემიის ნამდვილი წევრის (აკადემიკოსის) ვაკანტური ადგილის დასაკავებლად გამოცხადებული კონკურსის შესახებ. დღის წესრიგის მესამე საკითხთან დაკავშირებით, კერძოდ საქართველოს სოფლის მეურნეობის მეცნიერებათა აკადემიის ნამდვილი წევრის (აკადემიკოსის) ასარჩევად გამოცხადებული კონკურსის მაღალორგანიზებულად მომზადებისა და ჩატარების მიზნით აკადემიის პრეზიდენტის ბრძანებით შექმნილი საექსპერტო-საკონკურსო კომისიის დასკვნის შესახებ ისაუბრა საექსპერტო-საკონკურსო კომისიის თავმჯდომარემ, აკადემიკოსმა ნოდარ ჭითანავამ. აღნიშნულის შემდეგ ჩატარდა არჩევნები საქართველოს სოფლის მეურნეობის მეცნიერებათა აკადემიის მიერ გამოცხადებულ კონკურსში აკადემიის ნამდვილი წევრის (აკადემიკოსის) ვაკანტური ადგილის დასაკავებლად. 

არჩევნები ჩატარდა საარჩევნო დებულების სრული დაცვით.  ხმის მიცემის პროცედურაში მონაწილეობა მიიღო აკადემიის 23-მა ნამდვილმა წევრმა (აკადემიკოსმა).  აკადემიის ნამდვილი წევრობის (აკადემიკოსობის) კანდიდატი, სოფლის მეურნეობის დოქტორი ლევან უჯმაჯურიძე ფარული კენჭისყრის შედეგად ერთხმად იქნა  არჩეული  საქართველოს სოფლის მეურნეობის მეცნიერებათა აკადემიის ნამდვილ წევრად (აკადემიკოსად).  კრებამ მიულოცა ბატონ ლევანს სოფლის მეურნეობის მეცნიერებათა აკადემიის ნამდვილ წევრად (აკადემიკოსად) არჩევა და და უსურვა მრავალი წარმატებები სამეცნიერო, პედეაგოგიურ და საზოგადოებრივ საქმიანობაში. 

 ბატონმა ლ. უჯმაჯურიძემ მადლობა გადაუხადა აკადემიის ხელმძღვანელობას და თითოეულ აკადემიკოსს ესოდენ დიდი ნდობისათვის და აღუთქვა, რომ კიდევ უფრო მეტი შემართებით გააგრძელებს მუშაობას სამეცნიერო მიმართულებით და თავის წვლილს შეიტანს აკადემიის საქმიანობაში.

აკადემიის საერთო კრება დახურა აკადემიის პრეზიდენტმა, აკადემიკოსმა გურამ ალექსიძემ, რომელმაც დამსწრე საზოგადოებას მადლობა გადაუხადა მობრძანებისა და კრების მუშობაში აქტიური მონაწილეობის მიღებისათვის.