საქართველოს სოფლის მეურნეობის მეცნიერებათა აკადემიის მეცხოველეობისა და ვეტერინარიის სამეცნიერო განყოფილების აკადემიკოს-მდივანს, აკადემიკოს ჯემალ გუგუშვილს 2020 წლის 14 აპრილს დაბადებიდან 75 და სამეცნიერო, პედაგოგიური და საზოგადოებრივი მოღვაწეობის 50 წელი შეუსრულდა.

            საქართველოს სოფლის მეურნეობის მეცნიერებათა აკადემია გულითადად ულოცავს იუბილარს ამ ღირშესანიშნავ თარიღებს, უსურვებს ჯანმრთელობას და დიდხანს სიცოცხლეს, ნაყოფიერ შემოქმედებით, სამეცნიერო და საზოგადოებრივ საქმიანობას ჩვენი ქვეყნის საკეთილდღეოდ.

       2020 წლის 26 თებერვალს ჩატარდა აგრარული ინოვაციების კომისიის სხდომა, რომელზეც მოხსენებით: „უკუქცევით-წინსვლითი მოძრაობის ინოვაციური ელექტრომაგნიტური ვიბროძრავების  გამოყენება აგრარულ  ტექნოლოგიებში“ წარსდგა საქართველოს ტექნიკური უნივერსიტეტის ენერგეტიკისა და ტელეკომუნიკაციების ფაკულტეტის ელექტროენერგეტიკის და ელექტრომექანიკის დეპარტამენტის პროფესორი, ტექნიკის მეცნიერებათა დოქტორი გელა ჯავახიშვილი.

        მომხსენებელმა აღნიშნა, რომ უკუქცევით-წინსვლითი მოძრაობის ელექტრომაგნიტური ვიბროამგზნებების კონსტრუქციული შესრულების სიმარტივე, მომსახურეობის მოხერხებულობა, სრული ავტომატიზების შესაძლებლობა, მაღალი ენერეტიკული და საექსპლოატაციო მაჩვენებლები განაპირობებს იმას, რომ აღნიშნული ვიბროამგზნებები სულ უფრო ფართოდ იქნეს გამოყენებული სხვადასხვა ტექნოლოგიურ პროცესებში. მომხსენებლის მონაწილეობით დამუშავებული იქნა უკუქცევით-წინსვლითი მოძრაობის ელექტრომაგნიტური ვიბროძრავების ელექტრული და მაგნიტური წრედები, ამ ვიბროამგზნებებით აღჭურვილი მანქანა-დანადგარების კონსტრუქციები, სხვადასხვა აგროტექნოლოგიურ პროცესებში მათი გამოყენების თეორიული და პრაქტიკული კონცეფციები, შეიქმნა: უკუქცევით-წინსვლითი ელექტრომაგნიტური ვიბროამგზნების მაგნიტური გამტარების ორიგინალური კონსტრუქციები, აგრეთვე ენერგოდამზოგი მუდმივი დენის  შემაგნიტებიანი უკუქცევით წინსვლითი ელექტრომაგნიტური ვიბროამგზნებების ერთფაზა და სამფაზა სქემები რომლებზეც გაცემულია  საქართველოს პატენტები. შექმნილია მაღალმწარმოებლური, მცირეგაბარიტიანი, ენერგოდამზოგი  ელექტრომაგნიტური მანქანა-დანადგარები. შესრულებული სამუშაოების გამოყენების პერსპექტივა სოფლის მეურნეობის  სხვადასხვა დარგში პერსპექტიულია. ამ ვიბრაციული- მანქანა დანადგარების გამოყენება სასოფლო-სამეურნეო წარმოებაში იძლევა საგრძნობ ეკონომიურ ეფექტს.

აკადემიკოსი ვალერიან ცანავა– 85

2020 წლის 25 თებერვალს საქართველოს სოფლის მეურნეობის მეცნიერებათა აკადემიის  ნამდვილ  წევრს -  აკადემიკოს  ვალერიან ცანავას დაბადებიდან 85  და  სამეცნიერო–პედაგოგიური და საზოგადოებრივი მოღვაწეობის 60   წელი  შეუსრულდა. 

         ბატონო ვალერიან!

       საქართველოს სოფლის მეურნეობის მეცნიერებათა აკადემია გულითადად გილოცავთ ღირსშესანიშნავ  თარიღებს.  

     გისურვებთ  ჯანმრთელობას,   ხანგრძლივ   სიცოცხლეს,   

ნაყოფიერ და    წარმატებულ შემოქმედებით, სამეცნიერო–პედაგოგიურ და საზოგადოებრივ   საქმიანობას
  ჩვენი ქვეყნის   სასიკეთოდ.

            2020 წლის 21 თებერვალს ჩატარდა საქართველოს სოფლის მეურნეობის მეცნიერებათა აკადემიის საერთო კრება. კრებას, აკადემიის წევრების გარდა, ესწრებოდნენ საქართველოს გარემოს დაცვისა და სოფლის მეურნეობის მინისტრის მოადგილე პროფ. ს. პავლიაშვილი და მინისტრის მრჩეველი ბატონი ო. კაჭარავა, საქართველოს საპატრიარქოს წარმომადგენელი ბატონი ბ. გულუა, აკადემიის დარგობრივი ეროვნული კოორდინატორები, უმაღლესი საგანმანათლებლო ორგანიზაციების წარმომადგენლები, მოწვეული სტუმრები და აკადემიის თანამშრომელები.

          კრება შესავალი სიტყვით გახსნა აკადემიის პრეზიდენტმა აკად. გურამ ალექსიძემ, რომელმაც დამსწრე საზოგადოებას აცნობა, რომ აკადემიის ნამდვილ წევრს, გამოჩენილ მეცნიერსა და საზოგადო მოღვაწეს, ღირსეულ მოქალაქეს, აკადემიკოს ვალერიან ცანავას დაბადებიდან 85 და სამეცნიერო, პედაგოგიური და საზოგადოებრივი  მოღვაწეობის 60 წელი შეუსრულდა. აკადემიის პრეზიდენტმა აკად ვ. ცანავას გადასცა  აკადემიის მილოცვის დოკუმენტი და  უსურვა ჯანმრთელობა, ხანგრძლივი სიცოცხლე და მრავალი წარმატებები სამეცნიერო და საზოგადოებრივ საქმიანობაში. 

კრების დღის წესრიგის შესაბამისად სიტყვა ეძლევა საქართველოს სოფლის მეურნეობის მეცნიერებათა აკადემიის პრეზიდენტს აკად. გ. ალექსიძეს, რომელმაც დამსწრე საზოგადოებას გააცნო აკადემიის მიერ 2019 წელს გაწეული  საქმიანობის ვრცელი ანგარიში, მიმოიხილა საანგარიშო წელს აკადემიის მიერ ჩატარებული სამეცნიერო ღონისძიებები, მისი მონაწილეობა საზღვარგარეთის სამეცნიერო ფორუმებში, აკადემიის წევრების მონაწილეობა საზღვარგარეთისა და ადგილობრივ სხვადასხვა სამეცნიერო ღონისძიებებში, აკადემიის საგამომცემლო საქმიანობა, სხვადასხვა სამეცნიერო ორგანიზაციებთან ურთიერთ თანამშრომლობაზე გაფორმებული ხელშეკრულებებისა და აკადემიის წევრების მიერ გამოქვეყნებული პუბლიკაციების შესახებ. აკადემიის პრეზიდენტმა ისაუბრა აკადემიის სამომავლო გეგმებზე და განსაკუთრებული ხაზი გაუსვა სამთავრობო ღონისძიებებში აკადემიის მონაწილეობას წყალტუბოს სურსათით უზრუნველყოფისა და სასურსათო უფსაფრთხოების  საქმეში.

            (აკადემიის პრეზიდენტის აკად. გ. ალექსიძის პრეზენტაციის შინაარსი იხილეთ ბმულზე:  ნაწილი-1,   ნაწილი-2).

          აკადემიის საანგარიშო კრებაზე სამეცნიერო განყოფილებების მიერ 2019 წელს ჩატარებული მუშაობისა და 2020 წლის ამოცანების შესახებ მოხსენებებით გამოვიდნენ:

აკადემიის აგრონომიის სამეცნიერო განყოფილების აკადემიკოს-მდივანი, აკადემიკოსი გოგოლა მარგველაშვილი, აკადემიის მეცხოველეობისა და ვეტერინარიის სამეცნიერო განყოფილების აკადემიკოს-მდივანი, აკადემიკოსი ჯემალ გუგუშვილი, აკადემიის აგროინჟინერიის სამეცნიერო განყოფილების აკადემიკოს-მდივანი, აკადემიკოსი რევაზ მახარობლიძე, აკადემიის სურსათის უვნებლობის და სასურსათო ტექნოლოგიის სამეცნიერო განყოფილების აკადემიკოს-მდივანი,  აკადემიკოსი ზურაბ ცქიტიშვილი,

აკადემიის სატყეო საქმის სამეცნიერო განყოფილების აკადემიკოს-მდივნის მოადგილე  აკადემიკოსი გიორგი გაგოშიძე და აკადემიის ეკონომიკის სამეცნიერო განყოფილების აკადემიკოს-მდივანი, აკადემიკოსი ომარ ქეშელაშვილი. 

აკადემიის საერთო კრებამ აკადემიის 2019 წლის სამეცნიერო საქმიანობა შეაფასა დადებითად.

      აკადემიის საერთო კრებას მიესალმენ და აკადემიის მიერ 2019 წელს ჩატარებული  საქმიანობა და განხორციელებული ღონისძიებები დადებითად შეაფასეს და აკადემიის სამომავლო პერსპექტივებზე ისაუბრეს საქართველოს გარემოს დაცვისა და სოფლის მეურნეობის მინისტრის მოადგილემ, პროფ. სოლომონ პავლიაშვილმა და სამინისტროს სოფლის მეურნეობის  სამეცნიერო კვლევით ცენტრის დირექტორმა, პროფ. ლევან უჯმაჯურიძემ.

       აკადემიის საერთო კრებამ მიიღო შესაბამისი დადგენილებები, რომლებიც ეხება აკადემიის სამომავლო პერსპექტივებსა და 2020 წლის სექტემბერში, საქართველოში და კერძოდ საქართველოს სოფლის მეურნეობის მეცნიერებათა აკადემიაში ევროპის სოფლის მეურნეობის, სურსათისა და ბუნებათსარგებლობის აკადემიების კავშირის გენერალური ასამბლეის და საერთაშორისო სამეცნიერო კონფერენციის მაღალორგანიზებულ დონეზე ჩასატარებლად  აკადემიის საქმიანობას მოსამზადებელ პერიოდში.

            2020 წლის 21 თებერვალს საქართველოს სოფლის მეურნეობის მეცნიერებათა აკადემიას საქმიანი ვიზიტით ესტუმრენ განათლების, მეცნიერების, კულტურისა და სპორტის მინისტრის მოადგილე ქალბატონი ნუნუ მიცკევიჩი, სამინისტროს უმაღლესი განათლებისა და მეცნიერების დეპარტამენტის უფროსი ქალბატონი ნინო წერეთელი, ამავე დეპარტამენტის მეცნიერების სამმართველოს უფროსი ბატონი ზაზა მარუაშვილი და დეპარტამენტის თანამშრომელი ბატონი ზურაბ ხუციშვილი.

            სტუმრებს აკადემიის სამეცნიერო საქმიანობა გააქცნეს აკადემიის პრეზიდენტმა აკად. გურამ ალექსიძემ, აკადემიის აკადემიკოს-მდივანმა, აკადემიური დეპარტამენტის უფროსმა, აკად. ელგუჯა შაფაქიძემ და აკადემიის პრეზიდენტის მოადგილემ, დოქტ. ანატოლი გიორგაძემ.

            ბატონმა გურამ ალექსიძემ სტუმრებს გააცნო აკადემიის წევრების ძირითადი სამეცნიერო მიმართულებები, აკადემიის სამეცნიერო განყოფილებების სტრუქტურა და საქმიანობა, აკადემიის დარგობრივი ეროვნული კოორდინატორების ინსტიტუტის საქმიანობა, აკადემიის მონაწილეობა სამეცნიერო ორგანიზაციების კვლევით საქმიანობაში, აკადემიის კავშირები მსოფლიოს აგრარული მიმართულების საერთაშორისო ორგანიზაციებთან, როგორიცაა ევროპის სოფლის მეურნეობის მეცნიერებათა აკადემიების კავშირი (იტალია);CGIAR– სასოფლო – სამეურნეო კვლევის საერთაშორისო კონსორციუმი (ქ. ვაშინგტონი, აშშ); GFAR - აგრარული კვლევების გლობალური ფორუმი (ქ. რომი, იტალია), GFRAS-აგრარული კვლევების გლობალური საკონსულტაციო ცენტრი (ქ. ბაზელი, შვეიცარია), ICARDA-მშრალი რეგიონების სოფლის მეურნეობის კვლევის საერთაშორისო ცენტრი (იორდანია); CIMMYT-ხორბლისა და სიმინდის სელექციის საერთაშორისო ცენტრი (ქ. მეხიკო, მექსიკა); ICRISAT- ნახევრად მშრალი ტროპიკული კულტურების საერთაშორისო სამეცნიერო-კვლევითი ინსტიტუტი (ქ. ბატაჩერუ, ინდოეთი); Bioversity InternatioNALnal - საერთაშორისო ბიომრავალფეროვნების ცენტრი (ქ.რომი, იტალია); ACIRO– მსოფლიო მებოსტნეობის ცენტრი (ტაივანი); CACAARI– ცენტრალური აზიისა და სამხრეთ კავკასიის კვლევითი ორგანიზაციების ასოციაცია (უზბეკეთი); IFPRI- სურსათის პოლიტიკის კვლევის საერთაშორისო ინსტიტუტი (ქ.ვაშინგტონი, აშშ); CIP- კარტოფილის საერთაშორისო ცენტრი (ქ. ლიმა, პერუ); BACSA – შავი, კასპიის ზღვებისა და ცენტრალური აზიის მეაბრეშუმეობის ასოციაცია (ბულგარეთი); ჩინეთისა (CAAS) და  კორეის რესპუბლიკის სოფლის მეურნეობის მეცნიერებათა აკადემიები; უკრაინის აგრარული მეცნერების ეროვნული აკადემია, ბელორუსის მეცნიერებათა ეროვნული აკადემია; ვავილოვის მემცენარეობის ს/კ ინსტიტუტი (რუსეთი); ბონის უნივერსიტეტი (გერმანია).

            სტუმრებს აცნობეს, რომ აკადემიას გაფორმებული აქვს 40-მდე ურთიერთ თანამშრომლობის მემორანდუმი საზღვარგარეთისა და საქართველოს  სამეცნიერო ცენტრებთან და ორგანიზაციებთან.

            სტუმრები გაეცნენ აკადემიის მიერ გამოქვეყნებულ პუბლიკაციებს. აღსანიშნავია, რომ მხოლოდ 2019 წელს აკადემიის მიერ გამოცემულია მონოგრაფია - 10, დამხმარე სახელმძღვანელო - 5, ლექსიკონი – 2; რეკომენდაციები – 20; კონფერენციების შრომათა კრებული – 5, სამეცნიერო სტატიები – 213, მათ შორის უცხოეთის გამოცემებში გამოცემულია 5 მონოგრაფია და 40-მდე სამეცნიერო სტატია. აკადემიის წევრების მიერ მიღებულია 100-ზე  მეტი პატენტი გამოგონებებზე.

            სტუმრებს გააცნეს აკადემიის სტრუქტურა და განემარტათ, რომ აკადემიაში ფუნქციონირებს ფერმერთა და სპეციალისტთა კვალიფიკაციის ამაღლების კურსები, ბიომრავალფეროვნებისა და მცენარეთა გენეტიკური რესურსების სამეცნიერო-კვლევით ცენტრი, აკადემიის აჭარის სამეცნიერო-საკონსულტაციო ცენტრი, გამომცემლობა „აგრო“, სამეცნიერო ბიბლიოთეკა, სასოფლო-სამეურნეო პროდუქტების ექსონატების საგამოფენო დარბაზი და ა.შ.

            სტუმრებმა დაათვალიერს აკადემიის საგამოფენო და საკონფერენციო დარბაზები,  აგრეთვე აკადემიის სამეცნიერო განყოფილებების სხდომების ჩასატარებელი და  აკადემიის სტიპენდიატების სამუშაო სივრცეები, ისინი გაეცნენ აკადემიის თანამშრომელთა სამუშაო პირობებს და ა.შ. სტუმრებს ასევე გააცნეს აკადემიის სამომავლო გეგმები და  პერსპექტივები, სადაც ხაზი გაესვა აკადემიაში 2020 წლის 24-27 სექტემბერს ჩასატარებელ ევროპის სოფლის მეურნეობის, სურსათისა და ბუნებათსარგებლობის აკადემიების კავშირის მიერ ჩასატარებელ გენერალური ასამბლეის სხდომას და იმავე პერიოდში ჩასატარებელ საერთაშორისო სამეცნიერო კონფერენციას თემაზე „სოფლის მეურნეობის მექანიზაცია და ტექნოლოგიები ევროპაში და პერსპექტივები“. აკადემიის პრეზიდენტმა, აკად. გ. ალექსიძემ იმედი გამოთქვა, რომ სამინისტრო დაეხმარება აკადემიას ამ მეტად მნიშვნელოვანი საერთაშორისო ღონისძიების ჩატარებაში და ამავე დროს აკადემიას იმედი აქვს საქართველოს შოთა რუსთაველის ეროვნული სამეცნიერო ფონდის ფინანსური დახმარების.

2020 წლის 07 თებერვალს საქართველოს სოფლის მეურნეობის მეცნიერებათა აკადემიაში ჩატარდა აკადემიის პრეზიდიუმის გაფართოებული სხდომა, სადაც მოსმენილი იქნა აჭარის სოფლის მეურნეობის სამინისტროს მიერ 2019 წელს გაწეული საქმიანობის ანგარიში. პრეზიდიუმის სხდომას პრეზიდიუმის წევრების გარდა ესწრებოდნენ აკადემიის დარგობრივი ეროვნული კოორდინატორები და აკადემიის აპარატის წარმომადგენლები.

აჭარის ავტონომიური რესპუბლიკიდან პრეზიდიუმის სხდომას ესწრებოდნენ აჭარის სოფლის მეურნეობის მინისტრი ტიტე აროშიძე, სამინისტროს დეპარტამენტის უფროსი ირმა აფხაზავა და სამინისტროს პრესცენტრის ხელმძღვანელი როინ გოგაძე.

პრეზიდიუმის სხდომა შესავალი სიტყვით გახსნა საქართველოს სოფლის მეურნეობის მეცნიერებათა აკადემიის პრეზიდენტმა აკად. გურამ ალექსიძემ. აღინიშნა, რომ აჭარის სოფლის მეურნეობის სამინისტროსთან აკადემიას თანამშრომლობის მემორანდუმი გაფორმებული აქვს 2013 წლიდან და ამ პერიოდიდან ყოველწლიურად აჭარის სოფლის მეურნეობის მინისტრები გაწეული საქმიანობის შესახებ ანგარიშით გამოდიოდნენ აკადემიის პრეზიდიუმის სხდომებზე. მიმდინარე წელსაც ეს ტრადიცია არ დარღვეულა და მინისტრი ისევ მოხსენებით გამოდის აკადემიის პრეზიდიუმის გაფართოებული სხდომის წინაშე.

აჭარის სოფლის მეურნეობის მინისტრმა, ბატონმა ტიტე აროშიძემ დამსწრე საზოგადოებას გააცნო სამინისტროს საქმიანობა 2019 წელს, მის მიერ განხორციელებული მეტად მნიშვნელოვანი პროექტები, დეტალურად მიმოიხილა სამინისტროს მიერ განხორციელებული საქმიანობა მემცენარეობის, მეცხოველეობის, აგროინჟინერიის, მეციტრუსეობისა და ჩაის მოვლა-მოყვანის მიმართულებით, აღინიშნა სამინისტროს მიერ 2019 წლის აპრილის თვეში შავი, კასპიის ზღვებისა და ცენტრალური აზიის ქვეყნების მეაბრეშუმეობის ასოციაციის (BACSA) საერთაშორისო კონფერენციის ჩატარებაში აქტიური მონაწილეობა აკადემიასთან ერთად და სამინისტროს მიერ კონფერენციის ფინანსური საკითხების წარმატებით გადაწყვეტა. მინისტრმა ისაუბრა აგრეთვე სამინისტროს სამომავლო პერსპექტივებზე, მათ საერთაშორისო სამომავლო კავშირებზე, აჭარის მოსახლეობასთან მჭიდრო უთიერთობებზე და მათ დასახმარებლად განსახორციელებელ

მინისტრმა განსაკუთრებულად ხაზი გაუსვა აჭარის სოფლის მეურნეობის სამინისტროსა და საქართველოს სოფლის მეურნეობის მეცნიერებათა აკადემიას შორის მჭიდრო, საქმიან და მეცნიერულად დასაბუთებულ საქმიანობას, გამოთქვა სურვილი აკადემიის აჭარის სამეცნიერო-საკონსულტაციო ცენტრთან აქტიურ თანამშრომლობაზე.

            მინისტრის მოხსენებამ მსმენელთა დიდი ინტერესი გამოიწვია, გაიმართა დისკუსია, აზრთა გაზიარება, იყო ბევრი შეკითხვები, რაშიც აქტიური მონაწილეობა მიიღეს აკადემიკოსებმა ი. ვასაძემ, გ. მარგველაშვილმა, ჯ. გუგუშვილმა, გ. გაგოშიძემ, თ. ყურაშვილმა, ზ. ცქიტიშვილმა, ე. შაფაქიძემ, ნ. ჭითანავამ, აგრეთვე აკადემიის ეროვნულმა კოორდინატორებმა - დოქტორებმა ა. მესხიშვილმა და ნ. კიკნაველიძემ.

2020 წლის 29 იანვარს საქართველოს სოფლის მეურნეობის მეცნიერებათა აკადემიაში ჩატარდა აგრარული ინოვაციების კომისიის (თავმჯდომარე აკად. ა. დიდებულიძე) სხდომა, რომელზეც მოხსენებით - „ქართული ხორბლის მნიშვნელობა მსოფლიოში და მისი წარმოების სტრატეგია საქართველოში“, გამოვიდა პროფესორი ცოტნე სამადაშვილი - სოფლის მეურნეობის სამეცნიერო კვლევითი ცენტრის მარცვლოვანი კულტურების სამსახურის უფროსი, საქართველოს აგრარული უნივერსიტეტის პროფესორი; თანამომხსენებელი იყო აკადემიკოსი პაატა კოღუაშვილი. აღინიშნა, რომ საქართველოს კულტურული ფლორის ერთ-ერთი უძველესი მცენარეა ხორბალი და მსოფლიოში აღწერილი ხორბლის 27 სახეობიდან საქართველოში აღრიცხული და რეგისტრირებულია 14 ბუნებრივი სახეობა, მათ შორის 5 ენდემურია, რომლებიც ხასიათდება უნიკალური თვისებებით, რის გამოც ითვლებიან საუკეთესო გენეტიკურ წყაროდ მსოფლიო სელექციაში. უკანასკნელ წლებში მნიშვნელოვნად გაიზარდა ქართულ ხორბლებზე მოთხოვნილება. საქართველოს სოფლის მეურნეობის სამეცნიერო-კვლევით ცენტრში წარმატებით მიმდინარეობს ხორბლის ქართული გენოფონდის მოძიება, აღდგენა, შენახვა და გამრავლება. ცენტრის საცდელ ბაზებზე რეგიონების მიხედვით მრავლდება ხორბლის ქართული ენდემური სახეობები, აბორიგენული და ინტენსიური ჯიშები, რომ პოპულარიზაცია გაუწიოს და დააკმაყოფილოს ფერმერთა მოთხოვნილება. აღინიშნა, რომ მართალია,       სამთავრობო დოკუმენტებში მითითებულია ხორბლის კულტურის მოსავლიანობის გაზრდის მოთხოვნა, მაგრამ სასურველია მკაფიოდ იქნეს წარმოდგენილი ხორბლის სტრატეგია, რადგან ქვეყანაში ხორბლის კონკურენტუნარიანობის გაზრდა პირველ რიგში უნდა მიღწეული იქნეს მაღალხარისხოვანი სათესლე მასალის და ახალი აგროტექნოლოგიური ღონისძიებების გამოყენებით, რისთვისაც აუცილებელია თესლის გადამამუშავებელი-დამამზადებელი ინფრასტრუქტურის განვითარება და იმპორტის ჩანაცვლება ადგილობრივი მასალით, რაც შეუძლებელია მწარმოებლებსა და გადამამუშავებელ მრეწველობას შორის გრძელვადიანი, სტაბილური, პარტნიორული ურთიერთობების ჩამოყალიბების გარეშე.

სხდომის მონაწილეებისათვის მოხსენებამ დიდი ინტერესი გამოიჩინა. განხილულ საკითხზე გაიმართააზრთა გაზიარება და დისკუსია. მიღებული იქნა შესაბამისი სარეკომენდაციო წინადადებები.

აკადემიკოსი ნიკოლოზ ხომიზურაშვილი - 120

           2020 წლის 29 იანვარს ჩატარდა საქართველოს სოფლის მეურნეობის მეცნიერებათა აკადემიის პრეზიდიუმის გაფართოებული სხდომა, სადაც პატივი მიაგეს აკადემიკოს ნიკოლოზ ხომიზურაშვილის ნათელ ხსოვნას.

2020 წელს დაბადებიდან 120 წელი შეუსრულდებოდა საქართველოს სოფლის მეურნეობის მეცნიერებათა აკადემიის ერთ-ერთ დამფუძნებელს, აკადემიის ვიცე-პრეზიდენტს, აკადემიკოსს, საქართველოს მეცნიერებათა ეროვნული აკადემიის წევრ-კორესპონდენტს, მეცნიერების დამსახურებულ მოღვაწეს, სოფლის მეურნეობის მეცნიერებათა დოქტორს, პროფესორ ნიკოლოზ ხომიზურაშვილს.

პრეზიდიუმის სხდომა გახსნა აკადემიის პრეზიდენტმა აკად. გურამ ალექსიძემ. თავის შესავალ სიტყვაში მან აღნიშნა აკად. ნ. ხომიზურაშვილის დამსახურება ქვეყნის წინაშე, მისი სამეცნიერო, პედაგოგიური და საზოგადოებრივი მოღვაწეობის ძირითადი მომენტები და გაიხსენა ბატონ ნიკოლოზთან მისი ურთიერთობების ზოგიერთი პერიოდები.

აკად. ნ. ხომიზურაშვილის ცხოვრებასა და მოღვაწეობაზე ვრცლად ისაუბრა აკადემიკოსმა ვაჟა კვალიაშვილმა, რომელმაც დეტალურად აღწერა ბატონ ნ. ხომიზურაშვილის განვლილი ცხოვრების გზა. აღინიშნა, რომ ნ. ხომიზურაშვილი დაიბადა 1900 წლის 24 იანვარს, კახეთის ულამაზეს ქალაქ თელავში, 1919 წელს დაამთავრა თელავის ვაჟთა გიმნაზია, ხოლო 1925 წელს პირველი ხარისხის დიპლომით - თბილისის სახელმწიფო უნივერსიტეტის აგრონომიული ფაკულტეტი. გამორჩეული ახალგაზრდა კათედრაზე დატოვეს ასისტენტად და როგორც პერსპექტიული სპეციალისტი მიავლინეს გერმანიაში ცოდნის გაღრმავების მიზნით, სადაც მან 3 წელი დაჰყო და მუშაობდა საუკეთესო სამეცნიერო-კვლევით ინსტიტუტებსა და სასელექციო სადგურებში. სამეცნიერო-კვლევითი საკითხების გასაცნობად გერმანელი მეცნიერების კეთილი ნებითა და ხარჯებით ნიკოლოზ ხომიზურაშვილი გაეცნო საფრანგეთის, ბელგიის, იტალიის, ჰოლანდიის და დანიის გენეტიკისა და სელექციის სადგურებს. 1928 წლის დამლევს სამშობლოში დაბრუნებამდე მას ხელმძღვანელმა მეცნიერებმა შესთავაზეს გერმანიაში დარჩენა, აგრეთვე სხვადასხვა სამუშაო ადგილი, მაგრამ ვერ დაითანხმეს - ნიკოლოზ ხომიზურაშვილი სამშობლოში დაბრუნდა.

იგი გახლდათ საქართველოს სასოფლო-სამეურნეო ინსტიტუტის კათედრის გამგე და დეკანი, შემდეგ საქართველოს მებაღეობის, მევენახეობისა და მეღვინეობის სამეცნიერო-კვლევითი ინსტიტუტის დირექტორი, მუშაობის პერიოდში მისი ინიციატივით ინსტიტუტის ბაზაზე შეიქმნა მებაღეობა-მევენახეობის უნიკალური მუზეუმი, აღწერილი ჰქონდა საქართველოში კულტივირებული ხეხილის ჯიშების სახეობები და მათი კლასიფიკაცია; აკად. ნ. ხომიზურაშვილის კალამს ეკუთვნის მრავალი სამეცნიერო ნაშრომები, მათ შორის განსაკუთრებით აღსანიშნავია საქართველოს ხილის ატლასი, მეხილეობის სახელმძღვანელოები და „მეხილეობის“ 2 ტომი. დიდი ღვაწლი მიუძღვის „საქართველოს მეხილეობის“ ოთხტომეულის გამოცემაში. მისი ხელმძღვანელობით საქართველოში დაინერგა ნაგალა ხეხილი. იგი საქართველოში სამრეწველო მეხილეობის ერთერთი ფუძემდებელი იყო. საქართველოს მებაღეობის, მევენახეობისა და მეღვინეობის სამეცნიერო-კვლევითი ინსტიტუტის დირექტორად მუშაობის დროს მან დაამუშავა საყვავილე კვირტების ჩასახვა-განვითარების თეორია, შეისწავლა და იკვლევდა ხეხილის ზოგიერთი ჯიშის ციტოემბრიოლოგიას და ციტოგენეტიკის საკითხებს. ინსტიტუტის ბაზაზე შექმნა უნიკალური სამეცნიერო მუზეუმი. მის მიერაა აღწერილი ლეღვის ახალი სახეობები და მათი კლასიფიკაცია.

მომხსენებელმა გაიხსენა აგრეთვე, თუ როგორი წინააღმდეგობა გაუწია 1961 წელს აკად. ნ. ხომიზურაშვილმა ნიკიტა ხრუშჩოვის წინადადებას, რომ კახეთში ვაზი გაეჩეხათ და “მინდვრის დედოფალი” - სიმინდი დაეთესათ. მან დაარწმუნა ქვეყნის მაშინდელი ხელმძღვანელობა, რომ მისი წინადადება მცდარია და საქართველოში ვაზის გაჩეხვა და მევენახეობის განადგურება თავიდან იქნა აცილებული. მაგრამ ბატონი ნიკოლოზის სიჯიუტეს შეეწირა საქართველოს სოფლის მეურნეობის მეცნიერებათა აკადემია - რამდენიმე თვის შემდეგ, კრემლის მითითებით, სოფლის მეურნეობის მეცნიერებათა აკადემია, რომლის ვიცე-პრეზიდენტი აკად. ნ. ხომიზურაშვილი იყო, გაუქმდა. მან კი სიმწრით ჩაიცინა და თქვა „ცხენს ვერაფერი დააკლეს და უნაგირს დაუწყეს მტვრევაო“.

აკად. ნ. ხომიზურაშვილი დაჯილდოებული იყო მრავალი ორდენებით და მედლებით, საერთაშორისო გამოფენების საპატიო მედლებით, ხოლო 1966 წელს ბატონ ნიკოლოზის უმწიკვლო მეცნიერული, პედაგოგიური და საზოგადოებრივი მოღვაწეობა ღირსეულად დააფასა ქვეყნის უმაღლესი საბჭოს პრეზიდიუმმა და ნიკოლოზ ხომიზურაშვილს შრომის გმირის საპატიო წოდება მიენიჭა.

          პროფესორი ნ. ხომიზურაშვილი გარდაიცვალა 1971 წელს. დაკრძალულია მწერალთა და საზოგადო მოღვაწეთა დიდუბის პანთეონში.

მოგონებებით აკად. ნ. ხომიზურაშვილის მოღვაწეობის შესახებ პრეზიდიუმის სხდომაზე გამოვიდნენ აკადემიკოსები ნოდარ ჩხარტიშვილი და იუზა ვასაძე, ბატონ ნიკოლოზის შვილიშვილი ზურაბ ჭიპაშვილი.

        დღეს, საქართველოს და არა მარტო საქართველოს, არამედ მსოფლიოს ყველა აგრარიკოსი მეცნიერი, რომლებიც იცნობდნენ საქართველოს სოფლის მეურნეობის მეცნიერებათა აკადემიის აკადემიკოს ნიკოლოზ ხომიზურაშვილს და ისინიც, რომლებიც მას გადმოცემით ან სამეცნიერო შრომებიდან იცნობენ, უდიდეს პატივს მიაგებენ ამ პატრიოტი ადამიანის ნათელ ხსოვნას.

საინფორმაციო შეხვედრა   შოთა რუსთაველის  საქართველოს ეროვნულ სამეცნიერო ფონდში

        2020 წლის 10 იანვარს,  შოთა რუსთაველის  საქართველოს ეროვნულ სამეცნიერო ფონდში „Euraxess - საქართველოს“  პროექტის ფარგლებში,  გაიმართა სამუშაო   შეხვედრა. რუსთაველის ფონდი  იწყებს ევროკავშირის  კვლევებისა და ინოვაციების ორგანიზაცია   EURAXESS-ის სერვისების განვითარებას, ტრენინგებს  პარტნიორი უნივერსიტეტებისა და  სამეცნიერო-კვლევითი ცენტრების წარმომადგენლების მონაწილეობით. აღნიშნულ შეხვედრაში საქართველოს სოფლის მეურნეობოს მეცნიერებათა აკადემიიდან მონაწილეობდნენ პრეზიდენტის მოადგილე დოქტორი ანატოლი გიორგაძე და აკადემიის სამეცნიერო განყოფილებების სწავლული მდივანი დოქტორი რევაზ ლოლიშვილი.

      რუსთაველის სამეცნიერო  ფონდის გენერალურმა  დირექტორმა, ზვიად გაბისონიამ  ისაუბრა  EURAXESS-  საქართველოს  ფართო შესაძლებლობებზე, პროექტის მიმდინარეობაზე.  აღნიშნა, რომ  ვებგვერდი  ქართულ და ინგლისურ  ენებზე იქნება;  ხოლო სახელმძღვანელო ინფორმაცია აფხაზურ ენაზეც.  ჩატარდება ტრენინგები ტრენერებისათვის, რომლებიც შემდეგ თვითონ ჩაატარებენ ტრენინგებს პლატფორმის გამოყენების თაობაზე,   რუსთაველის ფონდის გეგმებზე საერთაშორისო პროექტებში. აღნიშნული ღონისძიებები მიმართულია კონკურსებში  ქართველი მეცნიერების წარმატების ინდექსის ასამაღლებლად.

       რუსთაველის ფონდის  გენერალური დირექტორის  მოადგილემ ნინო გაჩეჩილაძემ  წარადგინა პრეზენტაცია EURAXESS-  საქართველო, ისაუბრა პროექტის  Eusraxess Georgia Network Startup (EuGeNeS) შესახებ, EURAXESS-  -ის მნიშვნელობასა და  მიზნებზე, პორტალის  EURAXESS-  Georgia-ს შექმნასა და მის  შესაძლებლობებზე, საკომუნიკაციო სტრატეგიაზე, მოსალოდნელ შედეგებზე.

     ღონისძიებაზე წარმოდგენილი იყო  EURAXESS - საქართველოს ფარგლებში განსახორციელებელი აქტივობები, ამასთანავე EURAXESS-ის პორტალის თემაზე დაგეგმილი ტრენინგების შინააარსი და განრიგი.

     შეხვედრა კითხვა-პასუხის რეჟიმში წარიმართა, რომელშიც მონაწილეობდენ რუსთაველის სამეცნიერო ფონდის სამეცნიერო დეპარტამენტის  წარმომადგენლები ლანა დავითულიანი და სალომე შარაშენიძე.

      უახლოეს პერიოდში საქართველოს სოფლის მეურნეობის მეცნიერებათა აკადემიის ერთ-ერთი თანამშრომელი გაივლის შესაბამის ტრენინგს, რომლის შემდგომაც მოხდება აკადემიის  როგორც სამეცნიერო ორგანიზაციის რეგისტრაცია ევროკავშირის  კვლევებისა და ინოვაციების ორგანიზაცია   EURAXESS-ის ქსელში და ამავე ქსელში მოხდება აკადემიის მეცნიერთა ინდივიდუალური დარეგისტრირება. ყოველივე ეს კი გაზრდის აკადემიისა და ცალკეული მეცნიერების საერთაშორისო პროექტებში  ჩართვის შესაძლებლობებს.